ޕާކިސްތާނުގެ އޮފިޝަލުންގެ އެދިލެއްވުމަކަށް، އީރާނުން "އެއްބަސްވެވޭ ހުށަހެޅުމެއް" ތައްޔާރުކުރުމަށް ފުރުސަތު ދިނުމުގެ ގޮތުން، ވޮޝިންޓަނުން އީރާނާއެކު ގާއިމުކޮށްފައިވާ ހަމަލާބަދަލުކުރުން މެދުކަނޑާލުމުގެ އެއްބަސްވުމުގެ މުއްދަތު އިތުރުކުރާނެ ކަމަށް އެމެރިކާގެ ރައީސް ޑޮނަލްޑް ޓްރަމްޕް އަންގާރަ ދުވަހު ވިދާޅުވެއްޖެއެވެ.

ޓްރަމްޕްގެ ސޯޝަލް މީޑިއާ ޕްލެޓްފޯމް ކަމަށްވާ "ޓްރުތް ސޯޝަލް" ގައި ނެރުއްވި ބަޔާނެއްގައި ވިދާޅުވީ، އީރާނުގެ ލީޑަރުންނަށް "އެއްބަސްވެވޭ ހުށަހެޅުމެއް އެކުލަވާލެވެންދެން" އެ ގައުމާ ދެކޮޅަށް އަލުން އަސްކަރީ ފިޔަވަޅު އެޅުން ފަސްކުރުމަށް ޕާކިސްތާނުގެ އާމީ ޗީފް ފީލްޑް މާޝަލް އާސިމް މުނީރާއި ބޮޑުވަޒީރު ޝެހްބާޒް ޝަރީފް އެމެރިކާގެ ކިބައިން އެދިވަޑައިގެންފައިވާ ކަމަށެވެ.

Ad by Hajj Corporation

"އެހެންކަމުން، ކަނޑުގެ މަގުން އަޅާފައިވާ ހުރަސްތައް ދެމެހެއްޓުމަށާއި، އެހެނިހެން ގޮތްގޮތުން ތައްޔާރީ ހާލަތުގައި ތިބުމަށް އަޅުގަނޑު އަސްކަރިއްޔާއަށް އަމުރުކޮށްފީމެވެ. އަދި އެބޭފުޅުންގެ ހުށަހެޅުން ހުށަހަޅައި، މަޝްވަރާތައް ވަކި ގޮތަކަށް ނިމެންދެން ހަމަލާބަދަލުކުރުން މެދުކަނޑާލުމުގެ މުއްދަތު އިތުރުކުރާނަމެވެ،" އޭނާ ވިދާޅުވިއެވެ.

މީގެ އިތުރުން، އީރާނުގެ ލީޑަޝިޕް އޮތީ "ބޮޑުތަނުން ބައިބައިވެފައި" ކަމަށްވެސް ޓްރަމްޕް އެ ޕޯސްޓުގައި ފާހަގަކުރެއްވިއެވެ.

މިކަން އިއުލާނުކޮށްފައި މިވަނީ، އެމެރިކާގެ ނައިބު ރައީސް ޖޭޑީ ވެންސް އިސްކޮށް ހުންނަވައިގެން އެމެރިކާގެ ވަފުދެއް އީރާނާއެކު ދެވަނަ ބުރުގެ ސީދާ މަޝްވަރާތަކަށް އަންގާރަ ދުވަހު އިސްލާމްއާބާދަށް ދިއުމަށް ހަމަޖެހިފައި ވަނިކޮށެވެ. ނަމަވެސް، ވައިޓް ހައުސްގައި ބޭއްވުނު އިތުރު ސިޔާސީ ބައްދަލުވުންތަކެއްގެ ސަބަބުން މި ދަތުރު ލަސްވެފައިވާ ކަމަށް އެމެރިކާގެ އޮފިޝަލުން ބުނެއެވެ.

މި މަޝްވަރާތަކަކީ މި މަހުގެ ކުރީކޮޅު ޕާކިސްތާނުގައި ބޭއްވުނު މަތީ ފަންތީގެ ފުރަތަމަ ބުރުގެ ބައްދަލުވުންތަކަށްފަހު ބޭއްވުމަށް ހަމަޖެހިފައިވާ މަޝްވަރާތަކެކެވެ. ފުރަތަމަ ބުރުގެ ބައްދަލުވުންތައް ނިމުނީ އެއްވެސް ކުރިއެރުމެއް ނުލިބިއެވެ.

މި މަހުގެ ކުރީކޮޅު ފުރަތަމަ އިއުލާނުކުރި ހަމަލާބަދަލުކުރުން މެދުކަނޑާލުމުގެ އެއްބަސްވުމުގެ މުއްދަތު ހަމަވާން އޮތީ ބުދަ ދުވަހަށެވެ.