ޤަވާޢިދާ ޚިލާފަށް ރާއްޖޭގައި އުޅޭ ބިދޭސީންގެ މައްސަލަ ހައްލުކުރުމަށް ސަރުކާރުން ކުރިއަށްގެންދާ "އޮޕަރޭޝަން ކުރަނގި" އަކީ ބިދޭސީ މަސައްކަތްތެރިންނަށް އަދަބު ދިނުމަށް ހިންގާ އޮޕަރޭޝަނެއް ނޫން ކަމަށާއި، އެ އޮޕަރޭޝަންގެ އަސްލު ބޭނުމަކީ ބިދޭސީންގެ ހައްގުތައް ހިމާޔަތްކޮށް، އެމީހުންގެ ކަންކަން ރަނގަޅު ގޮތެއްގައި ތަރުތީބު ކުރުން ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ރައީސް މިހެން ވިދާޅުވީ މިއަދު ރައީސް އޮފީހުގައި ކުރިއަށްގެންދިޔަ ނޫސްވެރިންގެ ބައްދަލުވުމުގައެވެ.

Ad by Hajj Corporation

ރައީސް ވިދާޅުވީ، ރާއްޖޭގައި ބިދޭސީންގެ ކަންކަން ހިންގައި ބަލަހައްޓައިފައި ވަނީ ވަރަށް ޒިންމާދާރުކަން ކުޑަ ގޮތެއްގައި ކަމަށާއި ، ބިދޭސީންގެ އިންސާނީ ކަރާމާތައް ވެސް އުނިކަން އަންނަ ގޮތަށް ކަންކަން ހުރިކަން ރައީސް ފާހަގަ ކުރެއްވިއެވެ.

ނަމަވެސް މި ސަރުކާރުން ހިންގާ "އޮޕަރޭޝަން ކުރަނގި" ގެ ދަށުން، ރާއްޖޭގައި ދިރިއުޅޭ ބިދޭސީންނަކީ ކޮންބައެއްކަން ދެނެގަނެ، އެމީހުންގެ ހައްގުތައް ރައްކާތެރިކޮށް ކަށަވަރު ކުރުމަށް ގިނަ މަސައްކަތްތަކެއް ކުރެވެމުންދާ ކަމަށް ރައީސް ވިދާޅުވި އެވެ.

ރައީސް ވިދާޅުވި ގޮތުގައި، މި ސަރުކާރުން ހިންގި މި ޚާއްސަ ޕްރޮގްރާމްގެ ދަށުން، ރާއްޖޭގައި ދިރިއުޅޭ ބިދޭސީންގެ 98 އިންސައްތަ ދެނެގަނެ، ބަޔޯމެޓްރިކަލީ ދެނެގަނެވޭ ގޮތަށް ފޮޓޯ ނަގައި 10 އިނގިލީގެ ނިޝާން ރެކޯޑު ކުރުމުގެ މަސައްކަތް ވަނީ ނިންމައިލައިފައެވެ.