އެމެރިކާ ސިފައިން ހޯމުޒް ކަނޑުއޮޅީގެ ހަރަކާތްތައް ބެލުމަށް ފޮނުވާފައިވާ އީރާނުގެ ހަތަރު ޑްރޯންއެއް ވައްޓާލުމުން، މެދުއިރުމަތީގައި އޮތް ނުތަނަވަސްކަން އިންތިހާއަށް އިތުރުވެ، އީރާނުން ކުވޭތާއި ބަހުރޭނަށް އަމާޒުކޮށް ގިނަ އަދަދެއްގެ މިސައިލާއި ޑްރޯން ހަމަލާތަކެއް ފޮނުވާލައިފިއެވެ.

އެމެރިކާގެ ސެންޓްރަލް ކޮމާންޑް (ސެންޓްކޮމް) އިން ވަނީ، އީރާނުގެ ގޭޝްމް އައިލެންޑް އަދި ގޯރޫކްގައި ހުރި ރޭޑާ ސައިޓްތަކާއި އަސްކަރީ ކޮންޓްރޯލް ސްޓޭޝަންތަކަށް ހަމަލާދީފައެވެ. މީގެ އިތުރުން، ހޯމުޒް ކަނޑުއޮޅިއާ ދިމާލަށް ދަތުރުކުރި އީރާނުގެ ހަތަރު ޑްރޯންއެއް އެމެރިކާއިން ވަނީ ވައްޓާލާފައެވެ.

Ad by Hajj Corporation

މިކަމުގެ ރައްދުގައި އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރު.ޖީ.ސީ) އިން ވަނީ ކުވޭތާއި ބަހުރޭނަށް އަމާޒުކޮށް 30 އެއްހާ ބެލިސްޓިކް މިސައިލާއި ޑްރޯން ފޮނުވާލާފައެވެ. މި ހަމަލާތައް އަމާޒުކޮށްފައިވަނީ އެމެރިކާގެ އަސްކަރީ މަރުކަޒުތައް ހުންނަ ސަރަހައްދުތަކަށެވެ. އެގޮތުން ބަހުރޭނުގައި ހުންނަ އެމެރިކާގެ ފިފްތް ފްލީޓް ހިމެނޭ ސަރަހައްދަށާއި، ކުވޭތު އިންޓަނޭޝަނަލް އެއާޕޯޓް ކައިރީގައި އޮންނަ އެމެރިކާގެ ލޮޖިސްޓިކްސް ހަބެއް ކަމަށްވާ "ކާގޯ ސިޓީ" އަށް ވަނީ ހަމަލާދީފައެވެ.

މި ހަމަލާތަކާ ގުޅިގެން އީރާނުގެ މީޑިއާތަކުން ބުނާ ގޮތުގައި އެ ގައުމުގެ މަންދޫބުން ވަނީ ސުލްހައިގެ ވާހަކަތައް މެދުކަނޑާލާފައެވެ. ނަމަވެސް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވީ ވާހަކަތައް "ވަރަށް ރަނގަޅަށް" ކުރިއަށްދާ ކަމަށެވެ. އެހެންނަމަވެސް، ރަސްމީ އެއްބަސްވުމަކަށް ނާދެވިއްޖެ ނަމަ "ވަރަށް ހަރުކަށި ގޮތަކަށް" މި މައްސަލަ ހައްލުކުރަން އެމެރިކާ އޮތީ ތައްޔާރަށް ކަމަށް ޓްރަމްޕް ވަނީ އިންޒާރު ދެއްވާފައެވެ.