އީރާނާއެކު ސުލްހައިގެ އެއްބަސްވުމެއް ގާއިމުކުރުމާ މެދު ގޮތެއް ނިންމުމަށްޓަކައި ވައިޓް ހައުސްގެ ސިޓްއޭޝަން ރޫމްގައި ހުކުރު ދުވަހު ބައްދަލުވުމެއް ބާއްވަވާފައިވާ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެއެވެ.

ޓްރަމްޕް ވިދާޅުވީ އީރާނުގެ ބަނދަރުތަކަށް އެމެރިކާގެ ކަނޑުގެ ސިފައިން ކުރިމަތިކޮށްފައިވާ ހުރަސްތައް ނައްތާލާނެ ކަމަށާއި، ނަމަވެސް އީރާނުން ހޯރްމޫޒް ކަނޑުއޮޅި ހުޅުވާލައި، އެއްވެސް އިރެއްގައި ނިއުކްލިއާ ހަތިޔާރު ނުއުފެއްދުމަށް އެއްބަސްވާންޖެހޭނެ ކަމަށެވެ.

Ad by Hajj Corporation

ޓްރަމްޕްގެ 'ޓްރުތް ސޯޝަލް' ނެޓްވޯކްގައި ކުރެއްވި ދިގު ޕޯސްޓެއްގައި ވިދާޅުވީ، "ފަހުގެ ނިންމުމެއް ނިންމުމަށްޓަކައި މިހާރު ސިޓުއޭޝަން ރޫމްގައި ބައްދަލުކުރާނަން" ކަމަށެވެ.

މި ޕޯސްޓުގައި އެމެރިކާ އާއި އީރާނުގެ މަޝްވަރާވެރިންގެ މެދުގައި ހުރި މައިގަނޑު މައްސަލަތަކަށް އަލިއަޅުވާލާފައިވީ ނަމަވެސް، އޭގެ ތެރެއިން އެއްބަސްވުމަކަށް އާދެވިފައިވަނީ ކޮން ކަންތައްތަކެއްގައި ކަމެއް ސާފެއް ނުވެއެވެ.

ޓްރަމްޕް ވިދާޅުވި ގޮތުގައި އީރާނުން ކަނޑުއޮޅީގައި އަތުރާފައިވާ މައިންތައް ވަގުތުން ނަގަން ޖެހޭނެއެވެ. އަދި އޭގެ ބަދަލުގައި އެމެރިކާގެ ބްލޮކޭޑް ނައްތާލުމުން ތެޔޮ ޓޭންކަރުތަކާއި އެހެނިހެން އުޅަނދުތަކަށް ދަތުރުފަތުރު ކުރުމުގެ ފުރުސަތު ލިބިގެންދާނެއެވެ. ނަމަވެސް، މިކަމަށް އީރާނުން އެއްބަސްވެފައިވޭތޯ ނުވަތަ ޓްރަމްޕްގެ ނިންމުމުގެ ކުރިން ބްލޮކޭޑް ނައްތާލާފައިވޭތޯ އަދި އޮތީ ސުވާލު އުފެދިފައެވެ.

އީރާނުގެ ނިއުކްލިއާ ޕްރޮގްރާމާ ގުޅޭގޮތުން ޓްރަމްޕް ވިދާޅުވީ، އީރާނުގައި ރައްކާކޮށްފައިވާ ޔުރޭނިއަމްތައް އެމެރިކާއިން ނެރެ، އިންޓަނޭޝަނަލް އެޓޮމިކް އެނާޖީ އެޖެންސީ (އައިއޭއީއޭ) އާއި އީރާނާ ގުޅިގެން ނައްތާލާނެ ކަމަށެވެ. އަދި ހޯރްމޫޒް ކަނޑުއޮޅި އެއްވެސް ފީއަކާ ނުލައި ދެކޮޅަށް ދަތުރުކުރެވޭ ގޮތަށް ހުޅުވާލަން ޖެހޭނެ ކަމަށްވެސް އެމަނިކުފާނު ޝަރުތު ކުރެއްވިއެވެ.

މި އެއްބަސްވުމުގެ ބަދަލެއްގެ ގޮތުން އީރާނުން މާލީ ބަދަލު ހޯދުމަށާއި ހިފަހައްޓާފައިވާ ފައިސާ ދޫކޮށްލުމަށް އެދެމުންދާ ކަމަށް ރިޕޯޓްތައް ބުނާއިރު، ޓްރަމްޕް ވިދާޅުވީ "އިތުރު އެންގުމެއް އަންގަންދެން އެއްވެސް ފައިސާއެއް ބަދަލެއް ނުކުރެވޭނެ" ކަމަށެވެ. އަދި މިހާތަނަށް އެއްބަސްވެވިފައިވަނީ މާ މުހިންމު ނޫން ކަންތައްތަކަކަށް ކަމަށްވެސް އޭނާ ވިދާޅުވިއެވެ.

މިދިޔަ ފެބްރުއަރީ 28 ގައި އެމެރިކާ އާއި އިސްރާއީލުން އީރާނާ ދެކޮޅަށް ހަނގުރާމަ ފެށި ފަހުން، އޭޕްރިލް 7 ގައި ޓްރަމްޕް ވަނީ ހަމަލާބަދަލުކުރުން ހުއްޓާލުމެއް އިއުލާން ކުރައްވާފައެވެ. އީރާނުގެ ފާސް ނިއުސް އެޖެންސީން ބުނެފައިވަނީ ޓްރަމްޕްގެ ވާހަކަތަކަކީ "ތެދާއި ދޮގު އެކުލެވޭ" ވާހަކަތަކެއް ކަމަށެވެ.