އެމެރިކާގެ ރައީސް ޑޮނަލްޑް ޓްރަމްޕް ސަރަހައްދީ ސުލްހަ ގާއިމުކުރުމަށް ކުރައްވަމުން ގެންދަވާ އާދަޔާ ހިލާފު މަސައްކަތްޕުޅުތަކަށް ޕާކިސްތާނުގެ ބޮޑުވަޒީރު ޝެހެބާޒް ޝަރީފް މަރުހަބާ ވިދާޅުވެއްޖެއެވެ.

ބޮޑުވަޒީރު ޝެހެބާޒް ޝަރީފް އެކްސްގައި ކުރެއްވި ޕޯސްޓެއްގައި ވިދާޅުވީ، ރައީސް ޓްރަމްޕް މިއަދުގެ ވަގުތެއްގައި ސައުދީ އަރަބިއްޔާ، ގަތަރު، ތުރުކީ، މިސްރު، ޔޫއޭއީ، އުރުދުން އަދި ޕާކިސްތާނުގެ އިސްވެރިންނާއެކު ބޭއްވި ފޯނު ކޯލަކީ ވަރަށް ބޭނުންތެރި އަދި ނަތީޖާ ނެރެވޭނެ ފަދަ މަޝްވަރާތަކެއް ކަމަށެވެ.

Ad by Hajj Corporation

މި ފޯނު ކޯލުގައި ޕާކިސްތާނުގެ ފަރާތުން ބައިވެރިވެވަޑައިގަތީ ފީލްޑް މާޝަލް ސައިދު އާސިމް މުނީރު ކަމަށާއި، މި މުޅި މަރުހަލާގައި އޭނާ ކުރެއްވި ބުރަ މަސައްކަތްޕުޅުތަކަށް ބޮޑުވަޒީރު ވަނީ ޝުކުރު އަދާކުރައްވާފައެވެ.

ބޮޑުވަޒީރު އިތުރަށް ވިދާޅުވި ގޮތުގައި، މި މަޝްވަރާތަކަކީ މިހާރު ސަރަހައްދުގައި އޮތް ހާލަތާ ގުޅޭގޮތުން ހިޔާލު ބަދަލުކުރުމަށާއި، ދެމެހެއްޓެނިވި ސުލްހައެއް ގާއިމުކުރުމަށް ކުރެވެމުންދާ މަސައްކަތްތައް ކުރިއަށް ގެންދާނެ ގޮތްތަކާ މެދު ވާހަކަދެއްކުމަށް ލިބުނު މުހިންމު ފުރުސަތެކެވެ.

ޕާކިސްތާނުން ސުލްހައަށް ކުރާ މަސައްކަތްތައް ފުރިހަމަ އިހުލާސްތެރިކަމާއެކު ކުރިއަށް ގެންދާނެ ކަމުގެ ޔަގީންކަން ދެއްވަމުން، ޝެހެބާޒް ޝަރީފް ވިދާޅުވީ ސުލްހައިގެ ވާހަކަތަކުގެ ދެން އޮންނަ ބުރު ވަރަށް އަވަހަށް ޕާކިސްތާނުގައި ބޭއްވުމަށް އުންމީދު ކުރައްވާ ކަމަށެވެ.