މަސްވެރިކަމުގެ ސިނާއަތް ކޮޅަށްޖަހައި، މަހުގެ އަގު 20 ރުފިޔާގައި ހިފަހައްޓަވާނެކަމަށް ރައީސް ވިދާޅުވެއްޖެ
ޒިދާން މުޙައްމަދު
19 ޖޫން 2026 - 12:51
- 05:54 PMސައިޑް ހެޑްލައިންތަކާއެކު ލިޔޭ
- 05:54 PM
މަހުގެ އަގު 20 ރުފިޔާއަށްވުރެ ދަށްވިޔަނުދީ ހިފެހެއްޓުމަކީ ސަރުކާރުގެ އަމާޒެއް: ރައީސް
މަސްވެރިން ބާނާ މަހުގެ އަގު 20 ރުފިޔާއަށްވުރެ ދަށްވިޔަނުދީ ހިފެހެއްޓުމަކީ ސަރުކާރުގެ ބޮޑު އަމާޒެއް ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ "ދަ ޕަލްސް" ޕޮޑްކާސްޓުގެ ދެވަނަ އެޕިސޯޑުގައި ވާހަކަދައްކަވަމުންނެވެ.މަސްވެރިކަމުގެ ސިނާއަތް ކޮޅަށްޖެހުން
ރައީސުލްޖުމްހޫރިއްޔާ ވިދާޅުވީ އެމަނިކުފާނުގެ ސަރުކާރުން ވެރިކަމާ ހަވާލުވިއިރު މަސްވެރިކަމުގެ ސިނާޢަތް އޮތް ހާލަތުން އަރައިގަނެ، އެ ސިނާޢަތް ކޮޅަށްޖެއްސެވުމަށް ގިނަ މަސައްކަތްތަކެއް ކުރައްވަމުން ގެންދަވާ ކަމަށެވެ. އެގޮތުން މިފްކޯގެ ހިންގުން ހަރުދަނާކުރުމަށް ކުރެވުނު މަސައްކަތުން މިހާރުވެސް އެދެވޭ ނަތީޖާތަކެއް ފެންނަން ފަށާފައިވާކަން އެމަނިކުފާނު ފާހަގަކުރެއްވިއެވެ.މަހުގެ އަގު ހިފެހެއްޓުމުގެ ސިޔާސަތު
މަހުގެ އަގާ ގުޅޭގޮތުން ވާހަކަދައްކަވަމުން ރައީސް ވިދާޅުވީ، "މިކަމުގައި އަބަދުވެސް މަސައްކަތް ކުރަން ބޭނުންވަނީ މަހުގެ އަގު ހިފެހެއްޓޭނެ ގޮތަކަށް. 20 ރުފިޔާގެ ރެޓުގައި. އެހެންނަމަވެސް އެންމެ ދަށްކޮށްވިޔަސް 18 ރުފިޔާއަށްވުރެ ކުޑަނުވާނެގޮތަށް މަސްވެރިކަމުގެ ސިނާއަތުގެ ކަންކަން ސަރުކާރުން ތަންފީޒުކުރަމުންގެންދާނަން،" ކަމަށެވެ. އަދި އަމާޒަކީ އަބަދުވެސް 20 ރުފިޔާގައި އަގު ހިފެހެއްޓުން ކަމަށާއި، ފުރުޞަތު ލިބުނު މިންވަރަކުން އެއަށްވުރެ މައްޗަށް އަގު ގެންދިއުމަށް މަސައްކަތް ކުރައްވާނެ ކަމަށްވެސް ވިދާޅުވިއެވެ.ވެލިޔު އެޑްކުރުމާއި ބޭރުގެ ބާޒާރު
މި އަމާޒަށް ވާސިލުވުމަށްޓަކައި މިފްކޯގެ ކެޕޭސިޓީ އިތުރުކުރުމާއި، މަސް ރައްކާކޮށް ވެލިޔު އެޑްކުރެވޭނެ ގޮތްތައް ފަހިކުރުން މުހިންމުކަން ރައީސް ފާހަގަކުރެއްވިއެވެ. މީގެ އިތުރުން، އިނގިރޭސިވިލާތުން ރާއްޖޭގެ މަހަށް ދީފައިވާ ޓެރިފް އިނާޔަތްތައް ދާއިމީކުރުމަށް މަސައްކަތް ކުރައްވާނެ ކަމުގެ ޔަގީންކަންވެސް އެމަނިކުފާނު ދެއްވިއެވެ.އިޤްތިޞާދީ އިޞްލާޙީ ބަދަލުތައް
ސިނާޢަތަށް ކުރިމަތިވެފައިވާ ގޮންޖެހުންތަކަށް އަލިއަޅުއްވާލައްވަމުން ރައީސް ވިދާޅުވީ، ސަރުކާރު ހިއްސާވާ ކުންފުނިތަކުން ބޭނުންވާ ވަރަށްވުރެ އިތުރަށް ވަޒީފާ ދީފައި އޮތުމުގެ ސަބަބުން މަސްވެރިކަމުގެ ސިނާޢަތަށް މީހުން މަދުވެ، ހީނަރުކަން އައިސްފައިވާ ކަމަށެވެ. އެހެންކަމުން ކުންފުނިތައް ރައިޓް-ސައިޒް ކުރުމަށް ކުރާ މަސައްކަތުގެ ސަބަބުން މަސްވެރިކަމުގެ ދާއިރާއަށް ހެޔޮ ބަދަލުތަކެއް އަންނާނެ ކަމަށް އެމަނިކުފާނު ވިދާޅުވިއެވެ. ނިންމަވާލައްވަމުން ރައީސް ވިދާޅުވީ ސަރުކާރުގެ ސިޔާސަތަކީ ވަށާޖެހޭ އިޤްތިޞާދީ ނިޒާމެއްގެ ތެރެއިން މަސްވެރިކަމުގެ ސިނާޢަތަށް ދިމާވެފައިވާ މައްސަލަތައް ދާއިމީ ގޮތެއްގައި ހައްލުކުރުން ކަމަށެވެ.
