ހުޅުމާލޭގެ ދެވަނަ ފިޔަވަހީގެ ފަރުކޮޅުފުށި ހިއްކި ބިމުގައި މިރޭ ހިނގި މާރާމާރީއެއްގައި އަނިޔާވި މީހަކަށް ހޮސްޕިޓަލްގައި ފަރުވާދެމުން އަންނައިރު، އެ މާރާމާރީއާއި ގުޅިގެން އެކަކު ހައްޔަރުކޮށްފިއެވެ.

ފުލުހުން މައުލޫމާތު ދިން ގޮތުގައި މި ހާދިސާގެ ރިޕޯޓް ލިބިފައިވަނީ މިރޭ އިރުއޮއްސި 18:37 އެހާކަންހާއިރުއެވެ.

Ad by Hajj Corporation

މި މާރާމާރީގައި ދެ މީހަކަށް އަނިޔާވެގެން ހުޅުމާލެ ހޮސްޕިޓަލުގައި ފަރުވާދީފައިވެއެވެ. އަނިޔާވެފައިވަނީ 21 އަހަރުގެ ފިރިހެނަކަށާއި 34 އަހަރުގެ ފިރިހެނަކަށެވެ.

 ހޮސްޕިޓަލުން ފުލުހުންނަށް މައުލޫމާތު ދީފައިވާ ގޮތުގައި އެ ދެ މީހުންގެ ހާލުވެސް ސީރިއަސްއެއް ނޫނެވެ.

ފުލުހުން ވިދާޅުވީ، ހޮސްޕިޓަލަށް ގެންދިޔަ ދެ މީހުންގެ ތެރެއިން 21 އަހަރުގެ މީހާއަށް ފަރުވާ ދިނުމަށްފަހު ހޮސްޕިޓަލުން ވަނީ ދޫކޮށްލާފައެވެ. ނަމަވެސް، މާރާމާރީ ހިންގި ކަމުގެ ތުހުމަތުގައި އެ މީހާ މިހާރު ވަނީ ފުލުހުންގެ ބެލުމުގެ ދަށަށް ގެންގޮސް ހައްޔަރުކޮށްފައެވެ.

މި މައްސަލައާ ގުޅިގެން އިތުރު މީހަކު މިހާތަނަށް ހައްޔަރުކޮށްފައި ނުވާއިރު، ފުލުހުން ދަނީ މި މައްސަލަ އިތުރަށް ތަހުގީގު ކުރަމުންނެވެ.