ހުޅުމާލެ ދެވަނަ ފިޔަވަހީގައި ތެލެސީމިއާއަށް ހާއްސަ ހޮސްޕިޓަލެއް އެޅުމުގެ އެއްބަސްވުމުގައި ސޮއިކޮށްފި.

މިއީ ރާއްޖޭގައި ތެލެސީމިއާ ޕޭޝަންޓުންނަށް ބޭނުންވާ ސިއްހީ ހިދުމަތް ކުރިއެރުވުމަށް މުހިންމު ފިޔަވަޅެކެވެ.

ތެލެސީމިއާ ޕްރިވެންޝަން އެންޑް ކޮންޓްރޯލް މާސްޓާ ޕްލޭން އިފްތިތާހުކުރުމުގެ ރަސްމިއްޔާތުގައި މި އެއްބަސްވުން ރަސްމީކޮށް އެކުލަވާލާފައިވާއިރު، މި އެއްބަސްވުމުގައި ސޮއިކޮށްފައިވަނީ މެލޭޝިއާގެ މެޑޯ އޭޝީއާ ކުންފުންޏާއެކުއެވެ. އެގޮތުން އެ އެއްބަސްވުމުގެ ދަށުން ކުރިއަށް އޮތް ދިހަވަރަކަށް އަހަރު ދުވަހުގެ ތެރޭގައި ތެލަސީމިއާ ބަލީގެ ސަބަބުން ހާލުގައި ޖެހިފައިވާ ފަރާތްތަކުގެ ބޭނުންތައް ފުއްދައިދިނުމަށް ސްޓްރެޓެޖީތައް ވަނީ އެކުލަވާލާފައެވެ.

އެއްބަސްވުމުގައި ދިވެހި ސަރުކާރުގެ ފަރާތުން ސޮއިކުރެއްވީ ހެލްތު މިނިސްޓަރު އަބްދުﷲ ނާޒިމް އިބްރާހީމެވެ. މެޑޯ އޭޝިއާ ކުންފުނީގެ ފަރާތުން އެ ކުންފުނީގެ ސީއީއޯ އަދި އެމްޑީ ސްޓުއާޓް ޖޭ ވެނާ ޕެކް ސޮއި ކުރެއްވިއިރު، ޗިން ހިން ގްރޫޕްގެ ފަރާތުން ސޮއިކުރެއްވީ ގުރޫޕް ސީއީއޯ ރޮޖާ ލިން އެވެ.

ހެލްތް މިނިސްޓްރީން ބުނީ ހޮސްޕިޓަލް އެޅުމުގެ މަސައްކަތަކީ ސައިނޯމާ އިންޑަސްޓްރީ އިންޖިނިއަރިން ކޮމްޕެނީގެ ހިލޭ އެހީގެ ދަށުން ކުރިއަށް ގެންދާ މަސަތްކަތެއް ކަމަށެވެ.

މި ހަރަކާތުގެ ތެރެއިން ވަނީ އެ ހޮސްޕިޓަލުގެ ވީޑިއޯ ޕްރެޒެންޓޭޝަނެއް ދައްކާފައެވެ. އެގޮތުން އެ ވީޑިޔޯއިން ފެންނަ ގޮތުން، އެ ހޮސްޕިޓަލުގައި ތިން ފަންގިފިލާއެއް ހިމެނޭއިރު، ހާއްސަ ފެސިލިޓީތަކެއް ވެސް ހިމެނޭނެ އެވެ. އޭގެ ތެރޭގައި އިމަޖެންސީ ރޫމަކާއި ކެންޓީނަކާއި ކުޑަކުދިން ކުޅޭ ސަރަހައްދަކާއި ރޭޑިއޮލޮޖީ ޑިޕާޓްމަންޓަކާއި ލެބޯޓްރީއަކާއި ބްލަޑް ޓްރާންސްފިއުޝަން ޔުނިޓެއްގެ އިތުރުން ބްލަޑް އެންޑް އޯގަން ޓްރާންސްޕްލާންޓް ޔުނިޓެއް ހިމެނެ އެވެ.

ތެލެސީމިއާ ޕްރިވެންޝަން އެންޑް ކޮންޓްރޯލް މާސްޓާ ޕްލޭން އިފްތިތާޙްކޮށްދެއްވި ނައިބު ރައީސް ޙުސައިން ދެއްކެވި ވާހަކަފުޅުގައި، މި މަޝްރޫޢުގެ މުހިންމުކަމުގެ މައްޗަށް އަލިއަޅުއްވާލައްވަމުން، މި މަޝްރޫޢަކީ ރައީސުލްޖުމްހޫރިއްޔާ ޑރ މުޙަންމަދު މުޢިއްޒުގެ ރިޔާސީ ވަޢުދާ އެއްގޮތްވާ ގޮތުގެ މަތިން، ޚާއްޞަ ފަރުވާތަކަށް ބޭނުންވާ ޞިއްޙީ ޚިދުމަތުގެ އިންފްރާސްޓްރަކްޗާ އިތުރަށް ހަރުދަނާކުރެއްވުމަށް ވެވަޑައިގެންފައިވާ މަޝްރޫޢެއްކަން ފާހަގަކުރެއްވިއެވެ.

ތެލެސީމިއާ ޕޭޝަންޓުންނަށް ފުޅާ ދާއިރާއެއްގައި ފަރުވާ ދިނުމުގައި މި ހޮސްޕިޓަލުން މުހިންމު ދައުރެއް އަދާކޮށް، ގައުމީ މާސްޓާ ޕްލޭނުގައި ބަޔާންކޮށްފައިވާ ފުޅާ ދާއިރާއެއްގައި ސިއްހީ ލަނޑުދަނޑިތަކަށް އެހީތެރިކަން ފޯރުކޮށްދޭނެ ކަމަށް ބެލެވެއެވެ.