އާސަންދައިން ހާމަކޮށްފައިވާ ތަފާސްހިސާބުތަކުން ދައްކާގޮތުގައި މިއަހަރުގެ 2 ވަނަ ކުއަރޓާގައި އާސަންދަ ސްކީމުގެ ދަށުން 823 މިލިޔަން ރުފިޔާ ޚަރަދުކޮށްފައިވެއެވެ. މިއީ މިއަހަރުގެ އޭޕްރީލް މަހުން ފެށިގެން ޖޫން މަހާއި ހަމައަށް ކުރެވިފައިވާ ޚަރަދެވެ.

މިއީ ފާއިތުވި އަހަރުގެ މި މުއްދަތާ އަޅާބަލާއިރު 11.5 އިންސައްތައިގެ އިތުރުވުމެކެވެ. 2022 ވަނަ އަހަރުގެ 2 ވަނަ ކުއަރޓާގައި އާސަންދަ ސްކީމުގެ ދަށުން ބްލޮކްކުރެވުނު ޖުމުލަ ޚަރަދަކީ 738 މިލިޔަން ރުފިޔާއެވެ.

މީގެއިތުރުން، މިއަހަރުގެ 2 ވަނަ ކުއަރޓާގައި އާސަންދަ ސްކީމުގެ ދަށުން ޚިދުމަތް ހޯދި މީހުންގެ އަދަދުވެސް ވަނީ އިތުރުވެފައެވެ. އެގޮތުން މިދިޔަ އަހަރު 260،725 މީހުން ޚިދުމަތް ހޯދާފައިވާއިރު، މިއަހަރު އެ އަދަދު ވަނީ 265،059 އަށް އިތުރުވެފައެވެ.

އާސަންދައިގެ ތަފާސްހިސާބުތަކުން ދައްކާގޮތުން، މިއަހަރުގެ 2 ވަނަ ކުއަރޓާގައި އާސަންދަ ސްކީމްގެ ދަށުން 1،232 ފަހަރު ބަލިމީހުން އިމަރޖެންސީ ހާލަތުގައި އެއް ރަށުން އަނެއް ރަށަށް ގެންގޮސްފައިވެއެވެ. އަދި ޖުމުލަ 2،807 ބަލިމީހުން ވަނީ ސްކީމްގެ ދަށުން ރާއްޖެއިން ބޭރުން ފަރުވާ ހޯދާފައެވެ.

އާސަންދަ ސްކީމް އިތުރަށް ހަރުދަނާކުރުމަށް ސަރުކާރުން ވަނީ ނިންމަވާފައެވެ. އެގޮތުން، އާސަންދައިގެ ދަށުން ހިލޭ މެޑިކަލް ޗެކަޕް ހެދޭގޮތް ވެސް މިހާރު ވަނީ ހަމަޖައްސާފައެވެ.