ޒަކާތުގެ ފަންޑުގެ އެހީގައި އިންޑިއާއަށް ބޭސްފަރުވާއަށް ގެންދިޔަ ބަލިމީހާއަށް އެހީގެ ގޮތުގައި 1.5 މިލިއަން ރުފިޔާ ދީފައިވާ ކަމަށް އާސަންދަ އިން ބުނެފިއެވެ.

އާސަންދައިގެ ދަށުން ބެންގަލޫރުގެ އެސްޓާ ސީއެމްއައި އިން ފަރުވާ ހޯދަމުންދިޔަ ބަލިމީހަކަށް އާސަންދަ އެއްކޮށް ކަނޑާލާ ހާލުގައި ޖެއްސި ކަމަށް ބުނެ ފަތުރަމުންދާ ވާހަކަ އާސަންދައިން ދޮގުކޮށް ނެރުނު ބަޔާނެއްގައި ބުނީ، އުމުރުން 65 އަހަރުގެ އެމީހާއަކީ އެއާ އެމްބިއުލާންސް މެދުވެރިކޮށް ސައުދީ އަރަބިއްޔާގެ ޖިއްދާއިން އިންޑިއާއަށް ޒަކާތު ފަންޑުގެ އެހީގެ ގޮތުގައި ގެންދިޔަ މީހެއް ކަމަށެވެ. އެގޮތުން އާސަންދަ، އެންސްޕާ އަދި ޒަކާތު ފަންޑު ހިމަނައިގެން ދައުލަތުގެ ފަރާތުން އެހީގެ ގޮތުގައި ގާތްގަނޑަކަށް 1.5 މިލިއަނަށްވުރެ ގިނަ ރުފިޔާ އެ ފަރާތަށް ހަމަޖެއްސި ކަމަށް އާސަންދައިން ބުންޏެވެ.

އާސަންދައިން ބުނީ، އެމީހާއަށް ފަރުވާދެމުންދަނީ ހައިޕޮކްސިކް އިސްކެމިކް އެންސެފަލޯޕެތީއަށް ކަމަށާއި، އިންޓެންސިވް ރިހިބިލިޓޭޝަން ތެރަޕީ، އޮކިއުޕޭޝަނަލް ތެރަޕީ، ސްޕީޗް ތެރަޕީ، ސްވޮލޯވިންގް ތެރަޕީ އަދި ހައިޕަބަރިކް އޮކްސިޖަން ތެރަޕީ އަށް އެޑްމިޓްކުރުމަށް އެސްޓަ ސީއެމްއައި އިން އާސަންދައަށް މިއަހަރުގެ މާޗު މަހުގެ 14 ވަނަ ދުވަހު ރިކުއެސްޓް ފޮނުވާފައިވާ ކަމަށެވެ.

އަދި ބަލިމީހާގެ ޙާލަތު ފުރިހަމައަށް އިވެލުއޭޓްކުރުމަށްފަހު، މިދިޔަ މަހުގެ 18 އާއި ހަމައަށް ހޭދަވީ މުއްދަތުގައި ހޮސްޕިޓަލުން ފޮނުވި ހުރިހާ އިންޓެރިމް ބިލްތަކަށް އާސަންދައިން އެޕްރޫވް ދިން ކަމަށްވެސް އާސަންދައިން ބުނެއެވެ.

އަދި ފާއިތުވި 5 މަސްދުވަހުގެ މުއްދަތަށްފަހު، ބަލިމީހާގެ ހާލަތަށް ބަދަލެއް އައިސްފައި ނުވާތީ، އިތުރު ސަޕޯޓިވް ކެއާ ރާއްޖޭގައި ކުރިއަށް ގެންދިއުމަށް ވެންޓިލޭޓަރުގެ ސަޕޯޓާއެކު ބަލިމީހާ އަނބުރާ ގެނައުމަށް މިދިޔަ މަހުގެ 14 ވަނަ ދުވަހު އާއިލާއާއެކު މަޝްވަރާކޮށްފައިވާނެ ކަމަށް އާސަންދައިން ފާހަގަކޮށްފައިވެއެވެ.

އެގޮތުން ރާއްޖޭގައި އަލްޓަނޭޓިވް ރިހެބިލިޓޭޝަން އޮޕްޝަންތައް ހުރިކަމާއި ރާއްޖެއިން ބޭރުން ދިގު މުއްދަތަކަށް ރިހެބިލިޓޭޝަން ދިނުމަކީ އާސަންދަ ސްކީމުގެ ދަށުން ކަވަރު ނުކުރާ ކަމެއްކަން އާއިލާއަށް ކިޔާދީފައިވާނެ ކަމަށާއި، ރާއްޖޭގައި ކުރިއަށް ގެންދެވޭނެ ފަރުވާ ޕްލޭނަކާއެކު 3 ދުވަހުގެ ތެރޭގައި ބަލިމީހާ އަނބުރާ ރާއްޖެއަށް ބަދަލުކުރުމާ ގުޅޭގޮތުން ވެސް އާއިލާއާ ވާހަކަދައްކާފައިވާކަން އެ ކުންފުނިން ވާނީ ފާހަގަކޮށްފައެވެ.

އާސަންދައިން ބުނީ އޮގަސްޓު 18 ވަނަ ދުވަހުގެ ނިޔަލަށް ހޮސްޕިޓަލުގެ ފަރުވާއަށް ހިނގާފައިވާ ހަރަދު ތަކުގެ ފައިނަލް ބިލު ލިބިފައި ވާއިރު، ބިލަށް ޖުމްލަ 89،339.91 އެމެރިކާ ޑޮލަރު އަރާފައިވާ ކަމަށެވެ. އަދި އާސަންދަ ސްކީމުގެ ދަށުން ކަވަރު ނުކުރާ ޗާޖްތައް އުނިކުރުމަށްފަހު 85،989.15 ޑޮލަރު ބަލިމީހާގެ ބިލުން ހަމަޖައްސައިދިނުމަށް އެޕްރޫވްކޮށްފައިވާ ކަމަށް ވެސް އެ ކުންފުނިން ބުންޏެވެ.

އެޑިޓަރުގެ ނޯޓު: ހައިޕޮކްސިކް އިސްކެމިކް އެންސެފަލޯޕެތީ އަކީ ސިކުނޑިއަށް ބޭނުންވާ މިންވަރަށް އޮކްސިޖަން ނުލިބުމާއި ލޭ ދައުރުވުން މަދުވުމުގެ ސަބަބުން ދިމާވާ ފުރާނައަށް ނުރައްކާވާ ފަދަ ޙާލަތެކެވެ. އެކަމަށް ޚާއްސަ ފަރުވާއެއް ނެތް ނަމަވެސް، އަލާމާތްތަށް ރަނގަޅުކޮށް، މެނޭޖްކުރުމަށް އެހީތެރިވެދޭ ފަރުވާތައް އެކަމުގައި ހުރެއެވެ.