ރާއްޖެއިން ބޭރުން ހޮސްޕިޓަލެއް ގަންނަނާނެހާ ފައިސާ ބޭރުގެ ހޮސްޕިޓަލްތަކަށް އާސަންދައިން ޚަރަދުކުރާކަމަށް ރައްޔިތުންގެ މަޖިލީހުގެ ނައިބު ރައީސް އަޙްމަދު ނާޒިމް ވިދާޅުވެއްޖެއެވެ.

އެގޮތުން މިއަހަރުގެ ޖުލައި މަހުގެ 10 ވަނަ ދުވަހާ ހަމައަށް އާސަންދައިން 1.7 ބިލިއަން ރުފިޔާ ޚަރަދުކޮށްފައިވާ ކަމަށް ފިނޭންސް މިނިސްޓްރީން މަޢުލޫމާތު ދީފައިވާ ކަމަށް ނާޒިމް ވަނީ ފާހަގަކުރައްވާފައެވެ.

ދައުލަތަށް އަހަރަކު ލިބޭ 34 ބިލިއަން ރުފިޔާގެ ތެރެއިން ތިން ބިލިއަން ރުފިޔާ އާސަންދައަށް ޚަރަދުކުރަން ޖެހެއެވެ.

ނާޒިމް ވިދާޅުވީ، މުޅި ދައުލަތުގެ އާމްދަނީގެ 10 އިންސައްތަ މިއަދު އާސަންދައަށް ޙަރަދު ކުރަން ޖެހިފައިވާ ކަމަށެވެ. ނާޒިމް ވިދާޅުވީ، އާސަންދައިގެ ޚަރަދުތައް ކޮންޓްރޯލް ކުރުމަށް އަވަސް ފިޔަވަޅުތަކެއް އަޅަން ޖެހިފައިވާ ކަމެވެ.

2023 ވަނަ އަހަރު އާސަންދަ ސްކީމަށް ޖުމުލަ 3.2 ބިލިއަން ރުފިޔާ ބިލުކުރެވިފައިވާއިރު އޭގެ ތެރެއިން 1.1 ބިލިއަން، ހޭދަކުރެވިފައިވަނީ ބޭހާއި ކޮންސިއުމަބަލްސްގެ ގޮތުގައި އެވެ. މީގެ އިތުރުން ޕްރައިވެޓް މަރުކަޒުތަކުން އާސަންދައަށް 2022 ގައި 2 ބިލިއަން ބިލްކޮށްފައިވާއިރު، 2023 ވަނަ އަހަރު އެ އަދަދު ވަނީ 2.3 ބިލިއަނަށް އަރާފައެވެ.

އަދި ވޭތުވެދިޔަ 5 އަހަރު ތެރޭގައި އާސަންދައިގެ ނިޒާމަށް ކުރާ ޚަރަދު އެވްރެޖްކޮށް %65 ވަނީ އިތުރުވެފައިވާ ކަމަށް ތަފާސް ހިސާބުތަކުން ދައްކައެވެ.