އާސަންދައިން މީގެ ކުރިން ބަޔަކު ނެގީ ނާޖައިޒް ފައިދާ ކަމަށް ރައީސް އޮފީހުގެ ތަރުޖަމާނު ހީނާ ވަލީދު ވިދާޅުވެއްޖެއެވެ.

ލޮލުގެ ފަރުވާ އަކަށް އާސަަންދަ މެދުވެރިކޮށް މީގެ ކުރިން ދެމުން އަންނަ އިންޖެކްޝަނެއް މި ސަރުކާރުގެ އާސަންދަ ރީޕޯމް ގެ ދަށުން ނުލިބޭ ކަމަށް ބުނެ މީސްމީޑިއާގައި ޢާއްމު މީހަކު ފާޅުކޮށްފައި އޮތް ކަންބޮޑުވުމާއި ގުޅިގެން ރައީސް އޮފީސްގެ ތަރުޖަމާނު ހިނާ ވަލީދު ވިދާޅުވީ އާސަންދަ މީގެ ކުރިން ހިންގާފައިވަނީ އުސޫލުން ބޭރުން ކަމަށެވެ. އަދި މިއީ އާސަންދައިން ބޮޑު ނާޖާއިޒް ފައިދާއެއް ބަޔަކު ނެގިކަމުގެ ލާމަސީލު ހެއްކެއްކަމަށް ވެސް ހީނާ ވަނީ ވިދާޅުވެފައެވެ.

ފޭސްބުކްގައި ކުރެއްވި ޕޯސްޓެއްގައި ހިނާ ވިދާޅުވީ އާސަންދައިގެ ބޭހުގެ އަގު ރިވައިޒްކުރުމުގެ ތެރެއިން، އެންމެ ޚަރަދު ބޮޑު އެއް ބޭސްކަމުގައިވާ "ލުސެންޓިސް އިންޖެކްޝަން" ގެ އަގު ޗެކްކުރުމުގެ ގޮތުން ލޮލުގެ ފަރުވާގެ ޚިދުމަތް ދޭ އެ ފަރާތުން ބޭސް ގަންނަ އަގު ހޯދުމަށް އެދުމުން، ފޮނުވި އިންވޮއިސްތަކުން، އެ ބޭސް އެ ފަރާތަށް ގަންނަން ލިބޭ އަގަށްވުރެ ބޮޑުތަނުން ބޮޑުކޮށް އާސަންދައަށް ބިލްކޮށްފައިވާކަން ފާހަގަކުރެވުނު ކަމަށެވެ، އަދި 500$ މި ބޭސް ގެނެސް 23000 (ތޭވީސްހާސް) ރުފިޔާ އަށް އާސަންދަ އަށް ބިލްކޮށްފައިވާކަމަށާއި މިއީ އަށާރަ ރުފިޔާގެ ރޭޓުން ޑޮލަރު ބެލިކަމުގައިވިޔަސް، އެންމެ އިންޖިކްޝަނަކުން 14،000 (ސާދަހާސް) ރުފިޔާގެ ފައިދާއެއް ކަަމަށް ހިނާ ވިދާޅުވިއެވެ.

އާސަންދައިން އިންޖެކްޝަން ނުލިބޭ ކަމަށް ބުނެ އާއްމު ފަރާތުން ފޭސްބުކްގައި ހިއްސާ ކޮށްފައިާ މެސެޖް ފޮޓޯ--/ ފޭސްބުކް

މި ބޭސް އެތެރެކުރަން ރަޖިސްޓަރކޮށްފައިވަނީ މުޅިން އެހެން ކުންފުންޏަކުން ކަމުގައިވީ ނަމަވެސް އެ ފަރާތުން އެއްވެސް ވަރަކަށް މި ބޭސްއެތެރެކޮށްފައިނުވާ ކަމަށް ވެސް ހީނާ ވަނީ ވިދާޅުވެފައެވެ. ލޮލުގެ ފަރުވާގެ ޚިދުމަތްދޭ އެ ފަރާތުން ބޭސްވިއްކާފައިވަނީ ބޭސް އެތެރެކުރުމަށް ރަޖިސްޓަރީނުކޮށް ޕްރިސްކްރިޕްޝަންއަކަށް ކަމަށާއި އެކަމަކު ސްކީމްގެ ތެރެއިން އެ އިންޖެކްޝަނަށް އެންމެ ގިނައިން ބިލްކޮށްފައިވަނީ ބޭސްވިއްކާ ފަރާތުން ކަމަށް ވެސް ހިނާގެ މި ޕޯސްޓުގައި ވަނީ ފާހަގަކޮށްފައެވެ.

ހީނާ ވިދާޅުވީ މޯލްޑިވްސް ފުޑް އެންޑް ޑްރަގް އޮތޯރިޓީގައި ރަޖިސްޓަރީކޮށްފައިނުވާ އިންޖެކްޝަންއަކަށް ބިލުކޮށްފައިވާއިރު އަގުގެ ބޮޑު ތަފާތަކުން ބޮޑު ފައިދާއެއް ނަގަމުންދިޔަ އިރު އެކަން އާސަންދަ ކުންފުންޏަށް ނުވަތަ ނޭޝަނަލް ސޯޝަލް ޕްރޮޓެކްޝަން އެޖެންސީއަށް އަންގައިފައިނުވާ ކަމަށާއި، މިކަން ފާހަގަވީ މި ސަރުކާރުން މަސައްކަތް ފަށައި، އާސަންދައިގެ ބޭހުގެ އަގު ރިވައިޒްކުރުމުގެ ތެރެއިން ކަމަށެވެ. އަދި މި ކަން ހުއްޓުވުމަށް ފިޔަވަޅު އަޅައި އެންސްޕާގެ ވެލްފެއާ އެހީގެ ދަށުން މިހާރުވެސް ކޮންޓްރޯލްޑް އަގެއްގައި ބޭނުންވާ ފަރާތްތަކަށް މި ބޭސް ހޯދުމަށް އެހީތެރިކަން ފޯރުކޮށްދެމުން އަންނަ ކަމަށާއި މިކަން އިތުރަށް ފުރިހަމަކުރުމުގެ މަސައްކަތްވެސް ހިންގަމުން އަންނަ ކަމަށް ހީނާ ވަނީ ވިދާޅުވެފައެވެ.

އެކި އަމިއްލަ ފަރާތްތަކުން ވިޔަފާރީގެ ފައިދާއަށް އާސަންދަ ބޭނުންކުރުމުގެ ނަތީޖާއެއްގެ ގޮތުން، ރައްޔިތުންނަށް ބޮޑެތި ގެއްލުން ލިބޭކަން ފާހަގަކުރައްވައި ހީނާ ވިދާޅުވީ މިފަދަ ކަންކަން ދިމާވަނީ ޒަމާނުއްސުރެ ނިޒާމްގެ ތެރޭގައި ހުރި މިފަދަ އެތައް މައްސަލައަކަށް ސަމާލުކަން ނުދެވި، އެއް ނިޒާމް އަނެއް ނިޒާމާ ވާހަކަ ނުދެކެވި ބޮއްސުންލާން ދޫކޮށްލެވިފައި އޮތުމުގެ ސަބަބުން ކަމަށެވެ.

ހިނާ ވިދާޅުވީ ރައީސްގެ ލަފާފުޅުގެ ދަށުން، ﷲ ގެ އިރާދަފުޅާއެކު މި ސަރުކާރުން އެކަން ބަދަލުކޮށް އިސްލާޙު ކުރާނެކަމަށެވެ.