ޕެސިފިކް ކަނޑުގެ ސަރަހައްދުގައި އެލްނީނޯގެ ހާލަތު އުފެދިފައިވާތީ، އޭގެ ސަބަބުން ރާއްޖޭގެ މޫސުމަށް ކުރާނެ އަސަރުތައް ވަރަށް ގާތުން ބަލަމުންދާ ކަމަށް މޫސުމާބެހޭ ގައުމީ އިދާރާ (މެޓް އޮފީސް) އިން ހާމަކޮށްފިއެވެ.

އެލްނީނޯއަކީ ކަނޑުގެ ލޮނުގަނޑު އާދަޔާ ހިލާފަށް ހޫނުވުމުގެ ސަބަބުން ކުރިމަތިވާ ތަބީއީ ބަދަލެކެވެ.

Ad by Hajj Corporation

މެޓް އޮފީހުން ނެރުނު ބަޔާނެއްގައި ފާހަގަކޮށްފައިވާ ގޮތުގައި، ޕެސިފިކް ކަނޑުގެ މެދުތެރެއާއި އިރުމަތީ ބިތުގެ ކަނޑުގެ ލޮނުގަނޑުގެ ހޫނުމިން މިހާރު ހުރީ އާންމު ހާލަތަށްވުރެ މަތީގައެވެ. މިކަމުގެ ސަބަބުން ދުނިޔޭގެ ވައިގެ ދައުރުވުމަށާއި، ޕްރެޝަރަށް އަދި ވާރޭވެހޭ މިންވަރަށް ބޮޑެތި ބަދަލުތަކެއް އަންނާނެ ކަމަށް ލަފާކުރެވެއެވެ.

މި މޫސުމީ ބަދަލު އާންމުކޮށް 9 މަހާއި 12 މަހާ ދެމެދުގެ މުއްދަތަކަށް ދެމިގެންދިޔަ ނަމަވެސް، ބައެއް ފަހަރު އަހަރުތަކަކަށްވެސް މިކަން ދިގުލައިގެންދާކަން މެޓް އޮފީހުން ފާހަގަކުރެއެވެ. މިއީ ކޮންމެ ދެ އަހަރާއި ހަތް އަހަރަކުން އެއްފަހަރު ދިމާވާ ކަމެއް ކަމަށާއި، މީގެ ސަބަބުން ދުނިޔޭގެ މޫސުމަށާއި، އިގްތިސާދަށާއި، ތިމާވެށީގެ ނިޒާމަށް ބޮޑެތި ލޮޅުންތަކެއް އަރާ ކަމަށްވެސް އެ އިދާރާއިން ބުންޏެވެ.

މޫސުމާބެހޭ އިދާރާއިން ވިދާޅުވި ގޮތުގައި، އެލްނީނޯގެ ސަބަބުން ބައެއް ދުވަސްވަރު ވާރޭވެހޭ މިންވަރު އިތުރުވެފައި އަނެއްބައި ދުވަސްވަރު މަދުވެއެވެ. "ކޮންމެ އެލްނީނޯއެއްގައި މޫސުމަށް ކުރާ އަސަރު އެއްގޮތް ނުވެދާނެ،" މެޓް އޮފީހުގެ ބަޔާނުގައިވެއެވެ. އަދި އެލްނީނޯގެ ބާރުމިނަށް ބަލައި ރާއްޖޭގެ އެކި ހިސާބުތަކަށް ވާރޭވެހޭ މިންވަރު ތަފާތުވުމަކީ އެކަށީގެންވާ ކަމެއް ކަމަށްވެސް ބުނެފައިވެއެވެ.

ރާއްޖޭގެ ވާރޭވެހުމަށް ނުފޫޒު ފޯރުވަނީ ހަމައެކަނި އެލްނީނޯ ނޫންކަން ފާހަގަކުރަމުން މެޓް އޮފީހުން އިތުރަށް ބުނީ، އިންޑިއަން އޯޝަން ޑައިޕޯލް އާއި މެޑަން ޖޫލިއަން އޮސިލޭޝަން ފަދަ މޫސުމީ އެހެން ކަންކަމުގެ އަސަރުވެސް ރާއްޖެއަށް ކުރާ ކަމަށެވެ. އެހެންކަމުން، މި ހުރިހާ ކަމަކަށް ރިއާޔަތްކޮށް މޫސުމަށް އަންނަ ބަދަލުތައް މޮނިޓަރ ކުރަމުންދާނެ ކަމަށް އެ އިދާރާއިން ވަނީ ވިދާޅުވެފައެވެ.