ސަރުކާރުގެ އެންމެ މުހިންމު އެއް ވަޢުދު ކަމުގައިވާ ރައްޔިތުންނަށް ބޯހިޔާވަހިކަން ފޯރުކޮށްދިނުމުގެ މަސައްކަތްތައް ހުއްޓުމެއްނެތި ކުރިއަށްދާ ކަމަށާއި، 2028 ވަނަ އަހަރުގެ މެދުތެރެއަށް ދާއިރު ބޯހިޔާވަހިކަމުގެ ބޮޑެތި މަޝްރޫޢުތައް ނިންމައި، ރައްޔިތުންނާ ހަވާލުކުރައްވާނެކަމުގެ ޔަޤީންކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދެއްވައިފިއެވެ.

އެމަނިކުފާނު މިހެން ވިދާޅުވީ ރައީސުލްޖުމްހޫރިއްޔާގެ އޮފީހުގައި މިއަދު ހެނދުނު ބޭއްވެވި ނޫސްވެރިންގެ ބައްދަލުވުމުގައެވެ.

Ad by Hajj Corporation

ރައީސުލްޖުމްހޫރިއްޔާ ވިދާޅުވީ، މަޝްރޫޢުތައް ހަމައެކަނި ނިންމުމުގެ ބަދަލުގައި، ފްލެޓްތައް ނިންމައި ރައްޔިތުންނަށް އެތަންތަނަށް ވަދެ ދިރިއުޅެވޭނެ އިންތިޒާމު ހަމަޖެއްސުމަކީ މި ސަރުކާރުން ވަރަށް ބޮޑު އިސްކަމެއް ދޭނެ ކަމެއް ކަމަށެވެ. އެގޮތުން 2025 ވަނަ އަހަރުގެ ފަހުކޮޅު ހަވާލުކުރެއްވި 13 ރަށެއްގެ ހައުސިންގ މަޝްރޫޢުގެ އަމަލީ މަސައްކަތްތައް ފެށުމަށް މާލީ އިންތިޒާމުތައް ހަމަޖެހިފައިވާ ކަމަށް އެމަނިކުފާނު ފާހަގަކުރެއްވިއެވެ. މީގެ ތެރޭގައި ހުޅުމާލެއާއި ވިލިމާލޭގައި ހިންގާ ބީއެމްއެލްގެ ހައުސިންގ ފައިނޭންސް މަޝްރޫޢުތައް ވެސް ހިމެނޭއިރު، އަންނަ ޖުލައި މަހު ގިނަ މަޝްރޫޢުތަކެއްގެ ބިންގާ އެޅުމާއި ކޮންކްރީޓް މަސައްކަތްތައް ފެށިގެންދާނެއެވެ.

ގެދޮރު އެޅުމަށް ހުރި ދަތިތަކަށް ހައްލު ހޯދައިދިނުމުގެ ގޮތުން، ވޭތުވެދިޔަ އަހަރު ބީއެމްއެލް މެދުވެރިކޮށް ދޫކުރި އެފޯޑަބަލް ހައުސިންގ ލޯން ސްކީމްތައް މި އަހަރު ވެސް ކުރިއަށްގެންދަވާނެ ކަމަށް ރައީސުލްޖުމްހޫރިއްޔާ ވިދާޅުވިއެވެ. މީގެ އިތުރުން ހައުސިންގ ޓްރަސްޓް ފަންޑު އިތުރަށް ފުޅާކޮށް، އިކުއިޓީ ފައިނޭންސިންގ ގެ ފުރުޞަތުތައް ތަނަވަސްކޮށްދިނުމަށް މަސައްކަތް ކުރަމުންދާ ކަމަށާއި، އަންނަ އަހަރުގެ ބަޖެޓުން އެ ފަންޑަށް ޖާގަ ހޯދުމަށް ނިންމާފައިވާ ކަމަށް ވެސް އެމަނިކުފާނު ވިދާޅުވިއެވެ.

އަތޮޅުތަކުގައި ހުއްޓިފައި ހުރި މަޝްރޫޢުތަކާ ގުޅޭގޮތުން ރައީސުލްޖުމްހޫރިއްޔާ ވިދާޅުވީ، ކުޅުދުއްފުށީގެ 400 ހައުސިންގ ޔުނިޓްގެ މަސައްކަތް މި ހަފުތާގައި ޕްރައިވެޓް ކޮންޓްރެކްޓަރަކާ ހަވާލުކުރެވޭނެ ކަމަށެވެ. އަދި އެ ރަށުގައި ހިންގާ 2000 ހައުސިންގ ޔުނިޓްގެ ބޮޑު މަޝްރޫޢު ދެ އަހަރުބައިގެ ތެރޭގައި ނިންމުމަށް ވަނީ ރޭވިފައެވެ. ރަސްމާލޭގެ ބިންހިއްކުމުގެ މަސައްކަތުގެ 60 އިންސައްތަ ނިމިފައިވާއިރު، މި އަހަރުގެ ފަހުކޮޅު ބިންހިއްކުމުގެ މަސައްކަތް އެއްކޮށް ނިންމާލެވޭނެ ކަމަށް ވެސް އެމަނިކުފާނު ވިދާޅުވިއެވެ.

ބޯހިޔާވަހިކަމުގެ ލިސްޓުތަކާ ގުޅޭގޮތުން ވާހަކަފުޅުދައްކަވަމުން ރައީސުލްޖުމްހޫރިއްޔާ ވިދާޅުވީ، ލިސްޓުތައް އާންމުކުރުމުގެ ކުރިން ފުރިހަމައަށް ވެރިފައިކުރުމުގެ މަސައްކަތް ކުރަމުންދާ ކަމަށެވެ. "މި ސަރުކާރުން މިކަން ކުރިއަށްގެންދަނީ ހާމަކަން ބޮޑުކޮށް، އިންތިޒާމުތަކުގެ ތެރެއިން. އެއްވެސް ފަރާތެއްގެ ނުފޫޒެއް ނެތި ހައްގުވެރިންނަށް ގޯއްޗާއި ފްލެޓް ލިބޭނެކަމުގެ ޔަޤީންކަން އަރުވަން،" ރައީސުލްޖުމްހޫރިއްޔާ ވިދާޅުވިއެވެ. ސަރުކާރުގެ އަމާޒަކީ ސިޔާސީ ނުފޫޒުން އެއްކިބާވެ، ރައްޔިތުންގެ ބޯހިޔާވަހިކަމުގެ މައްސަލައަށް ދާއިމީ ހައްލެއް ހޯދައިދިނުމެވެ.