ވޯލްޑް ކަޕްގެ ގަދަ 16 އިން ބްރެޒިލް ޖާގަ ހޯދީ މެޗުގެ އިތުރު ވަގުތުގައި ގަބްރިއެލް މާޓިނެލީ ކާމިޔާބުކޮށްދިން ލަނޑާއެކު 2-1 އިން ޖަޕާން ބަލިކުރުމަށްފަހުއެވެ. ހިއުސްޓަން ސްޓޭޑިއަމްގައި ކުޅުނު މި ފޯރިގަދަ މެޗުގައި ބްރެޒިލް މޮޅުވީ ފަހަތުން އަރައި ދެއްކި މޮޅު ކުޅުމާއެކުގައެވެ.

މެޗުގެ ފުރަތަމަ ހާފުގައި ޖަޕާނުން ވަނީ ލީޑު ނަގާފައެވެ. މިއީ ބްރެޒިލްގެ ޑެނީލޯ ހެދި ގޯހެއްގެ ފައިދާ ނަގައި، ކައިޝޫ ސާނޯ ކާމިޔާބުކުރި ލަނޑެކެވެ. ނަމަވެސް ދެވަނަ ހާފު ފެށިގެން ބްރެޒިލުން ކުޅުން ރަނގަޅުކޮށް، 56 ވަނަ މިނެޓުގައި ކަސެމީރޯ ވަނީ ބޮލުން ފޮނުވާލި ހަމަލާއަކުން ނަތީޖާ ހަމަހަމަކޮށްދީފައެވެ. މިއީ އުމުރުން 34 އަހަރުގެ ކަސެމީރޯ ބްރެޒިލްގެ ގައުމީ ޓީމަށް ކާމިޔާބުކޮށްދިން 10 ވަނަ ލަނޑެވެ.

Ad by Hajj Corporation

މެޗު އެއްވަރުވެގެން އިތުރު ވަގުތަށް ދާން މިސްރާބު ޖަހާފައިވަނިކޮށް، ބްރެޒިލް މޮޅުކޮށްދިން ލަނޑު ޖަހައިދިނީ ބަދަލު ކުޅުންތެރިއެއްގެ ގޮތުގައި ކުޅެން އެރި މާޓިނެލީއެވެ. މެޗުގެ 95 ވަނަ މިނެޓުގައި އޭނާ މި ލަނޑު ކާމިޔާބުކުރީ ބްރޫނޯ ގިމަރޭޒް ތަނަވަސްކޮށްދިން ފުރުސަތަކުންނެވެ. ގިމަރޭޒް ވަނީ މި މުބާރާތުގައި މިހާތަނަށް 4 އެސިސްޓް ހަމަކޮށްފައެވެ.

ކާލޯ އަންޗެލޮޓީގެ އިރުޝާދުގެ ދަށުން ކުޅޭ ބްރެޒިލް ޓީމު ގަދަ 16 ގައި ބައްދަލުކުރަން ޖެހޭނީ އައިވަރީ ކޯސްޓް ނުވަތަ ނޯވޭއާއެވެ. މެޗަށްފަހު ތަފާސްހިސާބުތަކުން ދައްކާގޮތުގައި ބްރެޒިލުން 19 ހަމަލާ އުފެއްދިއިރު، ޖަޕާނަށް އުފެއްދިފައިވަނީ އެންމެ 5 ހަމަލާއެވެ. މި މޮޅާއެކު ބްރެޒިލުން ވަނީ މުބާރާތުގެ ކުއާޓާ ފައިނަލާ ގާތަށް ޖެހިލާފައެވެ.