ޣައްޒާގެ ދެކުނު ސަރަހައްދުގައި ހާލުގައި ޖެހިފައިވާ މީހުން ދިރިއުޅޭ ޓެންޓުތަކަށް އިސްރާއީލުގެ އިސްތިއުމާރީ ސިފައިން ވައިގެ މަގުން ދިން ހަމަލާތަކެއްގައި ގިނަ އަދަދެއްގެ ބަޔަކު ޝަހީދުކޮށްލައިފިއެވެ. ޚާން ޔޫނިސްގެ އަލް މަވާސީގައި ހުރި ޓެންޓު އަވަށްތަކަށް އަމާޒުކޮށް ދިން މި ހަމަލާތަކުގައި އަންހެނަކާއި އޭނާގެ ކުޑަ އަންހެން ދަރިފުޅު ހިމެނޭހެން ޖުމްލަ 8 މީހުން މަރުވެފައިވާ ކަމަށް ރިޕޯޓުތައް ބުނެއެވެ. މީގެ އިތުރުން މި އުދުވާނުގައި ގިނަ ބަޔަކު ޒަޚަމްވެފައިވާ ކަމަށްވެސް ޣައްޒާއިން ލިބޭ ޚަބަރުތަކުން އެނގެއެވެ.

ހަމަލާތައް ހުއްޓާލުމަށް ހަމާސްއާއެކު އެއްބަސްވުމަކަށް އައިސްފައިވީ ނަމަވެސް، އިސްރާއީލުން ގެންދަނީ އެ އެއްބަސްވުމާ ޚިލާފަށް މެދުކެނޑުމެއްނެތި އާންމުންނަށް ހަމަލާދެމުންނެވެ. ޣައްޒާގެ ސިއްހީ ވުޒާރާއިން ހާމަކޮށްފައިވާ ގޮތުގައި، މިދިޔަ އަހަރުގެ އޮކްޓޫބަރު 10 އިން ފެށިގެން މިހާތަނަށް 1,045 މީހުން ޝަހީދުވެފައިވާއިރު، 3,380 މީހުން ވަނީ ޒަޚަމްވެފައެވެ. މީގެ ތެރޭގައި ގިނައީ އަންހެނުންނާއި ކުޑަކުދިންނެވެ.

Ad by Hajj Corporation

އިސްރާއީލުން ގެންދަނީ ގެދޮރު ގެއްލިފައިވާ މީހުން ނިދާފައި ތިބޭ ވަގުތުތަކުގައި ޓެންޓުތަކަށް އަލިފާން ބޮން އަޅައި، އާއިލާތައް އެކުގައި ނައްތާލަމުންނެވެ. ރޭގައިވެސް އަލް މަވާސީގެ އަތިރިމަތީގައި ހުރި ޓެންޓަކަށް ޑްރޯން ހަމަލާއެއްދީ 2 މީހުން ޝަހީދުކޮށް 27 މީހުން ޒަޚަމްކޮށްލާފައިވެއެވެ. ހަމައެހެންމެ، ޚާން ޔޫނިސްގެ ބަނީ ސުލައިހާގައި އާންމުން އެއްވެ ތިބި ތަނަކަށް ދިން ހަމަލާއެއްގައި ކުޑަކުއްޖަކާއެކު ތިން މީހުން ޝަހީދުވެފައިވެއެވެ.

ޣައްޒާގެ ދެކުނުގެ އިތުރުން މެދުތެރެއާއި އުތުރުގެ ސަރަހައްދުތަކުގައިވެސް އިސްރާއީލުގެ ޓެރަރިސްޓު ހަމަލާތަކުގައި ގިނަ ބަޔަކު ޒަޚަމްވަމުންދެއެވެ. އަދި ބަރު ހަތިޔާރާއި އަސްކަރީ އުޅަނދުތަކާއެކު އާންމުންގެ އަވަށްތަކަށް ވަދެގަނެ، ބޮޑުބަޑިއާއި ބަޑީގެ ހަމަލާތައް އަމާޒުކުރަމުންދާ ކަމަށް ޣައްޒާގެ ރިޕޯޓުތަކުން ކަށަވަރުވެއެވެ.