އިންދިރާ ގާނދީ މެމޯރިއަލް ހޮސްޕިޓަލް (އައިޖީއެމްއެޗް) ގެ ނޭޝަނަލް ކާޑިއެކް ސެންޓަރަށް 10 އަހަރު ފުރުމުގެ މުނާސަބާ ފާހަގަކުރުމަށް ބޭއްވި ޚާއްސަ ރަސްމިއްޔާތު ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުޙައްމަދު މިއަދު ޝަރަފުވެރިކޮށްދެއްވައިފިއެވެ.

މި ރަސްމިއްޔާތު އޮތީ މިއަދު ހެނދުނު ދަރުމަވަންތަ ހޮސްޕިޓަލުގައެވެ. މި ރަސްމިއްޔާތަށް ރައީސުލްޖުމްހޫރިއްޔާގެ އަނބިކަނބަލުން ވަޑައިގަތުމުން އެކަމަނާއަށް މަރުޙަބާ ދެންނެވީ މާލޭ ސިޓީ ގްރޫޕް އޮފް ހޮސްޕިޓަލްސްގެ ޗީފް އެގްޒެކެޓިވް އޮފިސަރ އިބްރާހީމް ޢަބްދުއްރައްޒާޤު ޙަލީމެވެ.

Ad by Hajj Corporation

މި ހަފްލާގެ ތެރެއިން އެކަމަނާ ވަނީ ނޭޝަނަލް ކާޑިއެކް ސެންޓަރުގެ އާ ނަމާއި ލޯގޯ އިފްތިތާޙު ކޮށްދެއްވާފައެވެ. އެ ސެންޓަރުގެ އާ ނަމަކަށް ހަމަޖައްސާފައިވަނީ "ކާޑިއޯ ވެސްކިއުލަރ ސައިންސާ ބެހޭ ޤައުމީ މަރުކަޒު" އެވެ.

ރަސްމިއްޔާތުގެ ތެރެއިން، ނޭޝަނަލް ކާޑިއެކް ސެންޓަރަށް 10 އަހަރު ފުރުމުގެ މުނާސަބަތުގައި ތައްޔާރުކޮށްފައިވާ ޚާއްސަ ވީޑިއޯ ރިޕޯޓެއްވެސް ރައީސުލްޖުމްހޫރިއްޔާގެ އަނބިކަނބަލުން ބައްލަވާލެއްވިއެވެ. މި ރިޕޯޓުގައި ސެންޓަރުގެ ފާއިތުވި 10 އަހަރުގެ ކާމިޔާބީތަކާއި ޚިދުމަތުގެ ދަތުރު ހިމަނާފައިވެއެވެ.

އައިޖީއެމްއެޗްގެ ކާޑިއެކް ސެންޓަރަކީ ރާއްޖޭގައި ހިތުގެ ބަލިތަކަށް ފަރުވާ ދިނުމަށް ހުރި އެންމެ ޚާއްސަ މަރުކަޒެވެ. 24 ގަޑިއިރު ޚިދުމަތް ދެމުންދާ މި މަރުކަޒުގައި ހިތުގެ ބަލިތައް ދެނެގަތުމާއި، އޮޕަރޭޝަން ކުރުމުގެ ފުރިހަމަ ނިޒާމެއް ގާއިމުކޮށްފައިވެއެވެ. މީގެ ތެރޭގައި އައުޓްޕޭޝަންޓް އަދި އިންޕޭޝަންޓް ޚިދުމަތްތަކުގެ އިތުރުން، ކޮރޮނަރީ ކޭއާ ޔުނިޓް (ސީސީޔޫ) ގެ ފަރުވާތައް ހިމެނެއެވެ.

މި ސެންޓަރުން ފޯރުކޮށްދޭ މުހިންމު ޚިދުމަތްތަކުގެ ތެރޭގައި އީސީޖީ، ހޯލްޓަރ މޮނިޓަރިންގ، އިކޯކާޑިއޮގްރަފީ އަދި ޓީއެމްޓީ ފަދަ ޓެސްޓުތައް ހިމެނެއެވެ. އަދި ކެތު ލެބް މެދުވެރިކޮށް އެންޖިއޯގްރާމް އާއި އެންޖިއޯޕްލާސްޓީ ފަދަ އިންވޭސިވް ޕްރޮސީޖާތަކާއި، ކުޑަކުދިންގެ ހިތުގެ ބަލިތަކަށް ޚާއްސަ ފަރުވާތައްވެސް މި މަރުކަޒުން ފޯރުކޮށްދެއެވެ.

ޚިދުމަތް ހޯއްދަވާ ފަރާތްތަކުން އެޕޮއިންޓްމަންޓް ހެއްދުމަށް 3335336 ނުވަތަ 3316650 ނަންބަރަށް ގުޅުއްވުމަށް ހޮސްޕިޓަލުން އިރުޝާދުދެއެވެ. އެޕޮއިންޓްމަންޓް ހެއްދުމުގައި ލުއިފަސޭހަ ކުރުމަށްޓަކައި، ބަލިމީހާގެ ކުރީގެ ރިޕޯޓުތަކާއި މެޑިކަލް ރިކުއިޒިޝަން ފަދަ ލިޔެކިޔުންތައް ފުރިހަމަކުރުމަށް ހޮސްޕިޓަލުން އެދެއެވެ.