މާލޭގެ މަގުތަކަށް އަޅާފައިހުރި ކުނިތައް ނެގުމުގެ މަސައްކަތް ފަށައިފި ކަމަށް ސިޓީކައުންސިލުން ބުނެފި އެވެ.

މާލޭ ސިޓީ ކައުންސިލުން ބުނީ މާލެ ސިޓީގެ އެކި ސަރަހައްދުތަކުގެ މަގުތަކަށް ނެރެފައި ހުރި ގާކުނޑިތަކާއި ކުނިތައް ނަގައި، މަގުތައް ސާފުކުރުމުގެ މަސައްކަތް މިހާރު ކުރަމުން އަންނަ ކަމަށެވެ. ސިޓީ ކައުންސިލުން ބުނީ މިއީ މާލޭގެ މަގުތައް އަމާން އަދި ސާފުތާހިރު ތަނަކަށް ހެދުމަށް ކުރިއަށްގެންދާ މަސައްކަތެއް ކަމަށެވެ.

Ad by Hajj Corporation

މި މަސައްކަތާ ގުޅޭގޮތުން މާލެ ސިޓީ ކައުންސިލުން ބުނެފައި ވަނީ، މަގުތަކަށް ކުނި އަޅާ ފަރާތްތައް ފާހަގަކުރެވޭނަމަ އެކަން ކައުންސިލަށް ވީ އެންމެ އަވަހަކަށް އެންގުމަށް އެދޭ ކަމަށެވެ. އެ ގޮތުން، މަގުތަކަށް ކުނި އަޅާ މަންޒަރު ފެންނަ ފޮޓޯ ނުވަތަ ވީޑިއޯ، ކައުންސިލްގެ ހޮޓްލައިން ނަންބަރު 9341144 އަށް ހިއްސާކުރުމަށް ވެސް އެ ކައުންސިލުން އެދެ އެވެ.

މާލެ ސިޓީއަކީ، ސާފުތާހިރު ތަނެއްގެ ގޮތުގައި ބޭއްވުމަށް ޓަކައި ހުރިހާ ރައްޔިތުންގެ އެއްބާރުލުން ބޭނުންވާ ކަމަށާއި މަގުތަކަށް ކުނި ނޭޅުމަށާއި، ކުނި އުކާލުމުގައި ކަނޑައެޅިފައިވާ އުސޫލުތަކާ އެއްގޮތަށް ޢަމަލުކުރުމަށް ކައުންސިލުން އިލްތިމާސްކުރެ އެވެ.