މެކްސިކޯގެ ޗިއަޕަސް އައްސޭރިފަށަށް ރިކްޓަރ މިންގަނޑުން 7.3 ގެ ބާރުގަދަ ބިންހެލުމެއް އަތުވެއްޖެއެވެ.

މި ބިންހެލުމާ ގުޅިގެން ރާއްޖޭގެ މޫސުމާ ބެހޭ ގައުމީ އިދާރާ (މެޓް އޮފީސް) އިން ބުނެފައިވަނީ، މި ބިންހެލުމުގެ ސަބަބުން ދިވެހިރާއްޖެއަށް އެއްވެސް ނުރައްކަލެއް ނެތް ކަމަށެވެ.

Ad by Hajj Corporation

އެމެރިކާގެ ޖިއޮލޮޖިކަލް ސާވޭ (ޔޫ.އެސް.ޖީ.އެސް) އިން މައުލޫމާތުދޭ ގޮތުގައި، މި ބިންހެލުން އައިސްފައިވަނީ ހުކުރު ދުވަހުގެ ހެނދުނު އެ ގައުމުގެ ގަޑިން 08:49 ގައެވެ. މި ބިންހެލުން އުފެދިފައިވަނީ ބިމުގެ 15.2 ކިލޯމީޓަރު އަޑިން، މެކްސިކޯގެ މަސްވެރި ރަށެއް ކަމަށްވާ ޕުއެރްޓޯ މާޑެރޯ ކައިރިންނެވެ.

މި ބިންހެލުމާ ގުޅިގެން ޕެސިފިކް ކަނޑުގެ ބައެއް ސަރަހައްދުތަކަށް ވަނީ ސުނާމީގެ އިންޒާރު ނެރެފައެވެ. އެމެރިކާގެ ސުނާމީ ވޯނިންގ ސިސްޓަމުން ބުނެފައިވަނީ، މެކްސިކޯ އާއި ގުއަޓެމާލާގެ އައްސޭރިފަށަށް 0.3 މީޓަރާއި 1 މީޓަރާ ދެމެދުގެ އުސްމިނެއްގެ ރާޅު އެރުން އެކަށީގެންވާ ކަމަށެވެ. މީގެ އިތުރުން އެލްސަލްވަޑޯރު، ކޮލަމްބިއާ، ކޮސްޓަރީކާ، އެކުއެޑޯ، ނިކަރާގުއާ، ޕެނަމާ، ޕެރޫ އަދި ހޮންޑިއުރަސްގެ އައްސޭރިފަށަށް ވެސް ކުދި ރާޅު އެރުން އެކަށީގެންވާ ކަމަށް ލަފާކޮށްފައިވެއެވެ.

މެކްސިކޯގެ ނޭވީ ސެކްރެޓަރީ އެޑްމިރަލް ރޭމުންޑޯ މޮރާލެސް ވިދާޅުވީ، މިހާތަނަށް ބޮޑު ގެއްލުމެއް ލިބުނު ކަމުގެ ރިޕޯޓެއް ލިބިފައިނުވާ ކަމަށެވެ. ނަމަވެސް، ރައްކާތެރިކަމުގެ ފިޔަވަޅެއްގެ ގޮތުން ގޮނޑުދޮށްތަކާ ދުރުގައި ތިބުމަށް އާންމުންނަށް ވަނީ އިރުޝާދު ދީފައެވެ.

މި ބިންހެލުމުގެ އަސަރު ގުއަޓެމާލާ އަދި އެލްސަލްވަޑޯރަށް ވެސް ކޮށްފައިވާއިރު، ބައެއް އިމާރާތްތަކަށް ލޮޅުން އަރައިގެން މީހުން ވަނީ މަގުމައްޗަށް ނިކުމެފައެވެ. ގުއަޓެމާލާގެ ރައީސް ބަނާޑޯ އަރޭވަލޯ ވިދާޅުވީ، ކާރިސާތަކާ ބެހޭ އިދާރާތައް މިހާރު ހަރަކާތްތެރިވަމުންދާ ކަމަށާއި، އާންމުން ހަމަޖެހިގެން ތިބުމަށް އެދިވަޑައިގަންނަވާ ކަމަށެވެ.

މި ބާރުގަދަ ބިންހެލުމަށްފަހު، ރިކްޓަރ މިންގަނޑުން 4.7 އާއި 6 އާ ދެމެދުގެ ބާރުމިނުގައި ގިނަ އަދަދެއްގެ އާފްޓަރޝޮކްތައް ވެސް އަންނަނީ ރެކޯޑު ކުރެވެމުންނެވެ. ކަމާބެހޭ އިދާރާތަކުން ދަނީ ހާލަތު މޮނިޓަރ ކުރަމުންނެވެ.