އެލްނީނޯގެ ސަބަބުން ކުރިއަށް އޮތް ތިން މަހު ރާއްޖޭގެ ހޫނުމިން ހުންނާނީ އާންމު މިންވަރަށް ވުރެ މަތީގައި ކަމަށް މޫސުމާ ބެހޭ ގައުމީ އިދާރާއިން މިއަދު ލަފާކޮށްފިއެވެ.

Ad by Hajj Corporation

އަންނަ އަންގާރަ ދުވަހު ފެށޭ، ސެޕްޓެމްބަރު މަހުން ފެށިގެން އަންނަ ނޮވެންބަރުގެ ނިޔަލަށް މޫސުން ލަފާކުރާ ގޮތުގެ ބަޔާނެއް މެޓުން ވަނީ ނެރެފައެވެ.

އެ ބަޔާނުގައި ބުނި ގޮތުގައި، ކުރިއަށް އޮތް ތިން މަހު، މުޅި ރާއްޖޭގެ ހޫނުމިން ހުންނާނީ އާންމުކޮށް ހުންނަ މިންވަރަށް ވުރެ މަތީގައި ކަމަށެވެ.

އެ މުއްދަތުގައި އުތުރާއި މެދުރާއްޖެތެރޭގެ ބައެއް އަތޮޅުތަކަށް އާންމުކޮށް ވެހޭ މިންވަރަށް ވުރެ ގިނައިން ވާރޭވެހޭނެ ކަމަށާއި ދެކުނުގެ އަތޮޅުތަކަށް އެ މުއްދަތުގައި ވާރޭ ވެހޭނެ މިންވަރު އާންމު މިންވަރަށްވުރެ ދަށް ވާނެ ކަމަށް މެޓުން ވަނީ ބުނެފައެވެ.

މީގެއިތުރުން، އެ އިދާރާއިން ވަނީ، ޕެސިފިކް ކަނޑުގައި އެލްނީނޯގެ ބާރު ގަދަވަމުން އަންނަ ކަމަށާއި އެ ހާލަތު ވަރަށް ގާތުން ބަލަމުން އަންނަ ކަމަށެވެ.

އެލްނީނޯގެ ސަބަބުން، ރާއްޖޭގެ ކަނޑުގެ ލޮނުގަނޑު އާދާޔާޚިލާފަށް ހޫނުވެ، ފަރުތަކުގެ ދިރުމަށް ނުރައްކާވާނެ ކަމަށް މެޓުން ވަނީ ބުނެފައެވެ. މިގޮތުން، އެލްނީނޯގެ އަސަރުތަކާ ހެދި، ވާރޭ މިންވަރާއި ކަނޑުގެ ލޮނުގަނޑަށް އަންނަ ބަދަލުތަކުގެ ސަބަބުން ދަނޑުވެރިކަމާއި މަސްވެރިކަމަށް ނޭދެވޭ އަސަރުތައް ކޮށް، ގޮންޖެހުންތައް ކުރިމަތިވާނެ ކަމަށް މެޓުން ވަނީ ލަފާކޮށްފައެވެ. އެހެންވެ، މި ފަދަ ބަދަލުތަކަށް އެ ދާއިރާތަކުން ތައްޔާރުވުމަށް ވަނީ އިލްތިމާސްކޮށްފައެވެ.