ބޮޑުތަކުރުފާނު މަގު ތަރައްޤީ ކުރުމުގެ މަޝްރޫޢުގެ ދަށުން އެ ސަރަހައްދުގައި އަލަށް ތަރައްޤީ ކޮށްފައިވާ ޕާކިން ޒޯނު ސަރަހައްދުގައި ބޭންކް އޮފް މޯލްޑިވްސް(ބީއެމްއެލް) އަދި މޯލްޑިވްސް ޓްރާންސްޕޯރޓް ކޮމްޕެނީ(އެމްޓީސީސީ)އާ ގުޅިގެން ގަސް އިންދުމުގެ ހަރަކާތެއް ކުރިއަށް ގެންގޮސްފި އެވެ.

ގަސް އިންދުމަށް ބޭއްވި ޚާއްސަ ހަރަކާތް ފައްޓަވައިދެއްވީ، ބިނާރާއި ގެދޮރުވެރިކަމާއި އުމްރާނީ ތަަރައްޤީއާ ބެހޭ ވަޒީރު ޑރ. ޢަބްދުﷲ މުއްޠަލިބެވެ. މި ރަސްމިއްޔާތުގައި އެމްޓީސީސީގެ މެނޭޖިންގ ޑިރެކްޓަރ އަޙްމަދު ސައުދީއާއި، ކެބިނެޓުގެ ބައެއް ވަޒީރުންނާއި، ދައުލަތުގެ އިސްބޭފުޅުންގެ އިތުރުން މަޖިލިސް މެމްބަރުން ބައިވެރިވެ ވަޑައިގެންނެވިއެވެ. މީގެ އިތުރުން ބީއެމްއެލްއާއި އެމްޓީސީސީގެ ގިނަ މުވައްޒަފުންތަކެއް ވަނީ ބައިވެރިވެފައެވެ.

Ad by Hajj Corporation

އެމްޓީސީސީއިން މިހާރު މަގު ޒީނަތްތެރި ކުރުމުގެ މަސައްކަތް ފަށާފައިވާއިރު، ތަފާތު އެކި ގަސް ޖަހައި ރުއް ވަނީ އިންދާފައެވެ. މިއީ، ޤައުމީ ވަންތަކަމާއި ތިމާވެށީގެ އިސްނެގުމުގެ ދަށުން ފެހި، ދެމެހެއްޓެނިވި އާބަން މާހައުލެއް ގާއިމްކުރުމަށް ކުރި މަސައްކަތެކެވެ. ގަސް އިންދުމުގެ މަސައްކަތް ކުރަމުން އަންނައިރު ސަރުކާރުން އަންނަނީ، 5 މިލިޔަން ޕްރޮގްރާމްގެ ދަށުން ރާއްޖޭގެ އެކި ސަރަހައްދުތަކުގައި ގަސް އިންދަމުންނެވެ.

މިހާރު މަސައްކަތް ކުރިއަށްދާ ހެންވޭރު ފެރީ ޓާމިނަލުން ފެށިގެން އިއްޒުއްދީން ފާލަމާ ދެމެދު އޮތް ސަރަހައްދު ތަރައްޤީކޮށް ނިމުމުން ދެން އޮތް މަރުހަލާގައި އެމްޕީއެލް ސަރަހައްދުން ފެށިގެން ރަސްފަންނާ ހަމައަށް ތަރައްޤީކުރާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މީގެކުރިން ވަނީ ވިދާޅުވެފައެވެ.