އިނގިރޭސިވިލާތަށް ދިވެހިރާއްޖެއިން ކަނޑައަޅުއްވާ ސަފީރެއްގެ މަގާމަށް ޖަމީލާ އަލީ ހާލިދު އައްޔަން ކުރެއްވުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ރައްޔިތުންގެ މަޖިލީހަށް ފޮނުއްވައިފި އެވެ.

ދިވެހިރާއްޖޭގެ ފޮރިން ސަރވިސްގެ ޤާނޫނު ބަޔާންކުރާގޮތުން، ރާއްޖެއިން އެކި ގައުމުތަކަށް ކަނޑައަޅާ ސަފީރުން އައްޔަންކުރެއްވުމުގެ ކުރިން މަޖިލީހުގެ ރުހުން ހޯދަންޖެހެއެވެ.

Ad by Hajj Corporation

އިނގިރޭސިވިލާތަށް ކުރިން ސަފީރެއްގެ ގޮތުން ހުންނެވި އިރުތިޝާމް އާދަމް، ހާރިޖީ ވަޒީރުގެ މަގާމަށް ރައީސުލްޖުމްހޫރިއްޔާ އައްޔަންކުރެއްވުމާ ގުޅިގެން އެ މަގާމު ހުސްވެފައިވާއިރު، ޖަމީލާ އެ މަގާމަށް އައްޔަންކުރެއްވުމާ މެދު ގޮތެއް ނިންމުމަށް މި މައްސަލަ ވަނީ މަޖިލީހުގެ ހާރިޖީ ގުޅުންތަކުގެ ކޮމިޓީއަށް ފޮނުވާފަ އެވެ. އެ މަގާމަށް ޖަމީލާ އައްޔަންކުރެވޭނީ ކޮމިޓީން މައްސަލަ ދިރާސާކުރުމަށްފަހު މަޖިލީހުގެ ތަޅުމުން ނަގާ ވޯޓަކުން ފާސްވުމުންނެވެ.

ހާރިޖީ ދާއިރާގައި ފާހަގަކޮށްލެވޭ ފަދަ ތަޖުރިބާތަކެއް ލިބިވަޑައިގެންފައިވާ ޖަމީލާ ވަނީ މީގެ ކުރިން ބެލްޖިއަމަށް ރާއްޖެއިން ކަނޑައަޅުއްވާފައި ހުންނަވާ ސަފީރުކަމުގެ މަގާމު އިތުރުން ސިވިލް ސަރވިސް ކޮމިޝަނުގެ މެންބަރުކަންވެސް ކުރައްވާފައެވެ.