މޯލްޑިވްސް ޕޯޓްސް ލިމިޓެޑް (އެމްޕީއެލް) އިން 1 މިލިއަން ގަސް އިންދުމުގެ ޕްރޮގްރާމް އިއްޔެ ފަށައިފިއެވެ.

މި ޕްރޮގްރާމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ފައްޓަވާފައިވާ "5 މިލިއަން ގަސް" ޕްރޮގްރާމަށް އެއްބާރުލުން ދިނުމުގެ ގޮތުން ފެށި ޕްރޮގްރާމެކެވެ.

މި ޕްރޮގްރާމް ފެށީ ތިލަފުށީގައި އިއްޔެ ބޭއްވުނު ރަސްމިއްޔާތެއްގައެވެ. މި ރަސްމިއްޔާތުގައި މޫސުމީ ބަދަލުތަކާއި ތިމާވެއްޓާ ހަކަތައާއި ބެހޭ ވުޒާރާއިގެ ވަޒީރު ޠާރިޤް އިބްރާހިމް އާއި އެމްޕީއެލްގެ ސީއީއޯ މުހައްމަދު ވަޖީޙް އިބްރާޙީމް ވަނީ ބައިވެރިވެ، ގަސް އިންދާފައެވެ.

ސުމީ ބަދަލުތަކާއި ތިމާވެއްޓާ ހަކަތައާއި ބެހޭ ވުޒާރާއިން ބުނީ، މި ޕްރޮގްރާމްގެ ދަށުން ޕޯޓްސް ލިމިޓެޑުން އިންދާނެ 1 މިލިއަން ގަހަކީ ރާއްޖޭގެ ތިމާވެށި ރައްކާތެރިކުރުމަށް އެޅޭ ވަރަށް މުހިންމު ފިޔަވަޅެއް ކަމުގައި ބެލެވޭކަމަށެވެ. އަަދި މި މަޝްރޫޢުގެ ސަބަބުން ރާއްޖޭގެ ގުދުރަތީ މާޙައުލު ރައްކާތެރިކޮށް ދެމެހެއްޓުމަށް އިތުރު ބާރެއް ލިބިގެންދާނެ ކަމަށެވެ. އަދި އެމްޕީއެލްގެ ވެރިންނާއި މުވައްޒަފުންގެ މި އިސްނެގުމަކީ އެ ފަރާތްތަކުން ތިމާވެއްޓަށްދޭ އަހައްމިއްޔަތު ހާމަވެގެން ދިޔަކަމެއްކަން އެ ވުޒާރާއިން ވަނީ ފާހަގަކޮށްފައެވެ.

ރާއްޖޭގައި ފަސް މިލިއަން ގަސް އިންދުމުގެ މަޝްރޫޢު އިފްތިތާހް ކުރެވިގެންދިޔައީ މިއަހަރުގެ ތިމާވެށީދުވަހުއެވެ. މިއީ މޫސުމީ ބަދަލުތަކުން ލިބޭ ގެއްލުން ކުޑަކޮށް، ރާއްޖޭގެ ތިމާވެށީގައި ނެތިދިޔުމުގެ ބިރު ހީވެފައިވާ ގަސްގަހާގެހި އާލާކޮށް، ރާއްޖެ ހޫނުވުން ކުޑަކުރުމަށް ރައީސް ޑރ. މުޙައްމަދު މުޢިއްޒު އިޢުލާންކުރެއްވި ޤައުމީ ޕްރޮގްރާމެކެވެ.މި މަޝްރޫޢުގެ މައިގަނޑު މަޤްޞަދަކީ ރާއްޖޭގެ ތިމާވެށި ހިމާޔަތްކޮށް، މޫސުމަށް އަންނަ ބަދަލުތަކުގެ ނޭދެވޭ އަސަރުތައް ކުޑަކުރުމެވެ.