ބަންކަރިންގެ ޙިދުމަތަށް ބޭނުންވާ އިތުރު އާ އުޅަނދެއް މިމަހު 15 ގައި ރާއްޖެއަށް ގެނައުމުގެ މަސައްކަތް ކުރަމުން އަންނަކަމަށް އެސްޓީއޯ އިން ހާމަކޮށްފިއެވެ.

މި މަހުގެ 12 ވަނަ ދުވަހު ފެށުމަށް ހަމަޖެހިފައިވާ ބަންކަރިންގެ ޙިދުމަތަށް ބޭޏުންވާ އާ އުޅަނދެއް މިއަދު ކުޅުއްދުއްފުޓަށް ވަނީ ގެންގޮސްފައެވެ. މީގެ އިތުރަށް މި ޙިދުމަތަށް ބޭނުންވާނެ އިމާރާތެއް ވެސް އުލިގަމުގައި ވަނީ ގާއިމްކޮށްފައެވެ. "އުލިގަމު އިންޓަނޭޝަނަލް ޝިޕް އެންޑް ޕޯޓް ސެކިއުރިޓީ ގޭޓް" ގެނަމުން ނަންދެވިފައިވާ މި އިމާރާތުގެ ސަބަބުން ހިދުމަތްދޭ މުވައްޒަފުންނަށް ބޮޑެތި ފަސޭހަތަކެއް ލިބިގެންދާނެކަމަށް އެމްޕީއެލްގެ ސީއީއޯ މުހައްމަދު ވަޖީހު ވަނީ ވިދާޅުވެފައެވެ.

ބަންކަރިން ޙިދުމަތްތަކުގެ މައުލޫމާތާއި ޙިދުމަތަށް އެދޭނެ ގޮތުގެ ތަފްސީލް މިކަމަށް ހާއްސަ ވެބްސައިޓު( ޔޫއެމްއެސް) މެދުވެރިކޮށް ލިބޭނެއެވެ.މި ވެބްސައިޓުން ލިބޭ ޙިދުމަތްތަކުގެ ތެރޭގައި ޕައިލޮޓޭޖް ސާވިސް، ކުރޫ ޗޭންޖް، އެސްޓީއެސް (ޝިޕް ޓު ޝިޕް ސާވިސް)، ލޯންޗު ސާވިސް، ވޯޓަރ ސާވިސް، ސަޕްލައި އޮފް ޕްރޮވިޝަންސް، ލުބްރިކޭޓިން އެންޑް ހައިޑްރޯލިކް އޮއިލް ސަޕްލައި، ޔޮޓް ޑޮކިން ސާވިސް، މެއިންޓެނެންސް ސާވިސް، އަންޑަވޯޓާ ސާވިސް، ޓަގް ސާވިސް، މެރިން ސެލްވޭޖް އަދި ރިސެޕްޝަން ފެސިލިޓީސް ހިމެނެއެވެ.

ބަންކަރިންގެ ޙިދުމަތްތައް ދިނުމަށް ކަނޑައަޅާފައިވަނީ އެމްޕީއެލް އަދި އެސްޓީއޯ ގުޅިގެންނެވެ.