ޕްރީމިއަރ ލީގުގެ ތަށި ހޯދުމަށް އެންމެ ބޮޑަށް ވާދަކުރާނެކަމަށް ބެލެވުނު އާރސެނަލްއަށް ރޭ ބޯންމަތު އާއި ކުރިމަތިލާން ޖެހުނީ ހިތްދަތި ރެޔަކަށެވެ. މިއީ މިމިސީޒަންގައި ޕްރީމިއަރ ލީގުގައި އާރސެނަލްއަށް ލިބުނު ފުރަތަމަ ބައްޔެވެ.

Ad by Hajj Corporation

މެޗުގެ ކުރީކޮޅު ދެޓީމު ވަރަށް ވާދަވެރިކޮށް ކުޅުނު ނަމަވެސް، މެޗުގެ 30 ވަނަ މިނެޓުގައި އާރސެނަލްގެ ޑިފެންޑަރު ވިލިއަމް ސަލީބާ ބޯންމައުތުގެ ބްރެޒިލް ފޯވާޑް އެވަނިލްސަން އަށް ކުރި ފައުލަކާއި ގުޅިގެން ރަތް ކާޑު ދެއްކުމާއެކު މެޗުގެ އޮއިވަރު ބަދަލުވެގެން ދިޔައެވެ. އަދި މިހިސާބުން ފެށިގެން މެޗުގެ ބޮޑުބައެއް ކޮންޓްރޯލް ކުރަމުން ގެންދިޔައީ ބޯންމައުތުންނެވެ.

ބޯންމައުތުގެ ވިޓާލިޓީ ސްޓޭޑިއަމްގައި ކުޅުނު މި މެޗުގައި ބޯންމައުތް އަށް ލަނޑުޖަހާނެ ރަނގަޅު ފުރުސަތުތަކެއް ލިބުނުކަން ފާހަގަކުރެވެއެވެ. މެޗުގެ ފުރަތަމަ ގޯލް ބޯންމައުތް އަށް ކާމިޔާބުކޮށްދިނީ ލިބުނު ކޯނަރަކުން ޖާޒީ ނަންބަރު 10 ރަޔަން ކްރިސްޓީއެވެ. އަދި 79 ވަނަ މިނެޓުގައި ލިބުނު ޕެނަލްޓީއަކުން ޖަސްޓިން ކްލައިވެޓް ޖެހި ގޯލާއިއެކު އާރސެނަލްގެ އުންމީދުތައް ފުނޑުފުނޑުވެގެން ދިޔައެވެ. މިއީ ބޯންމައުތުގެ ތާރީޚުގައި އާސެނަލް އަތުން މޮޅުވި ދެވަނަފަހަރުކަން ފާހަގަކޮށްލެވެއެވެ.

ޜޭގެ މެޗުގެ ރަތްކާޑާއިއެކު އާސެނަލްގެ އެންމެމޮޅު އެއް ޑިފެންޑަރަށް މިމަހު 27 ވަނަ ދުވަހު އެމިރޭޓްސް ސްޓޭޑިއަމް ގައި ލިވަޕޫލާއި ދެކޮޅަށް ކުޅޭ ވާދަވެރި މެޗުގައި ނުކުޅެވޭނެއެވެ. އަދި މިބަލިވުމާއެކު، މިހާރު ލިވަޕޫލް އަދި މެންޗެސްޓަރ ސިޓީއާ ދެމެދުގައި އޮތް ފަރަގު އިތުރުވުމުގެ ފުރުސަތު ވަރަށް ބޮޑެވެ. ކުރިއަށް އޮތް މެޗުތަކުގައި ލިވަޕޫލް، ނިއުކާސަލް އަދި ޗެލްސީއާ ކުރިމަތިލާން ޖެހޭއިރު، މިރޭ ގެއްލުނު 3 ޕޮއިންޓް އަނބުރާ ހޯދުމަށް އާރސެނަލްއަށް ބޮޑެތި ކާމިޔާބީތަކެއް ބޭނުންވާނެއެވެ. މިއީ މިދިޔަ ސީޒަންގައި 2 ޕޮއިންޓުގެ ފަރަގަކާއިއެކު ލީގު ގެއްލުނު އާސެނަލް އަށް މިއީ ލީގު ކާމިޔާބުކުރުމަށް އިތުރު ހުރަހަކަށްވާނެ ނަތީޖާއެކެވެ. މި ބައްޔާއެކު އާސެނަލް އޮތީ 17 ޕޮއިންޓާއެކު ލީގުގެ 3 ވަނައިގައެވެ.