ސިޔާސީ އޮއިވަރާ ހެދި އިހުތިރާމް ކުރުމުގެ ރޫހު ވަނީ ނެތިފައި ކަމަށާއި އެއް ނިޔަތެއްގައި އިސްލާހު ކުރަން އުޅެފިއްޔާ މިއީ އުނދަގޫ ކަމެއް ނޫން ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިރޭ ވިދާޅުވެއްޖެ އެވެ.

ދައުލަތުގެ މީޑިއާ ޕީއެސްއެމްގެ "ނޭޝަން ޗެޓް" ޕްރޮގްރާމްގައި ވާހަކަ ދައްވަމުން ރައީސް ވިދާޅުވީ ރާއްޖޭގެ އިޖްތިމާއީ ފެރޭން ނެތިގެން ގޮސްފައިވާ ކަމަށެވެ. އަދި މިއީ ހިތާމަ ކުރަންޖެހޭ ކަމެއް ކަމަށާއި، މީގެ ކުރިން ދިވެހިންނަކީ ފަހުރުވެރިކަމާ އެކީ މީހުންނަށް ކަމޭހިތާ ބައެއް ކަމަށް ވެސް ރައީސް ފާހަގަ ކުރެއްވެވި އެވެ.

Ad by Hajj Corporation

ރާއީސް ވިދާޅުވީ ގައުމު ގައުމެއްގެ ގޮތުގައި މިނިވަންކަންމަތީ ކުރިޔަށްދާން ބޭނުންވާނަމަ ކާބަފައިން މިގައުމު އަޅުގަނޑުމެންނާ ހިސާބަށް ގެނައި ގެނައުން އަމާނާތްތެރިކަމާ އެކު ޒިންމާއެއްގެ ގޮތުގައި ކުރިޔަށް ގެންދަންޖެހޭ ކަމަށެވެ. އަދި އެމަގުން އަނެއްކާ ވެސް ގައުމު އިސްލާހު ކުރަންޖެހޭ ކަމަށް ވެސް ރައީސް ވިދާޅުވި އެވެ.

ރާއްޖެއަކީ ކުޑަ މުޖްތަމައުއެއް ކަމަށާއި އެންމެން އެކީ އެއް ނިޔަތެއްގައި އިސްލާހު ކުރަން ނުކުމެއްޖިއްޔާ އެއީ ނުވާވަރުގެ ކަމެއް ނޫން ކަމަށް ވެސް ރައީސް ފާހަގަ ކުރެއްވެވި އެވެ.