ދިވެހިރާއްޖެ ސައްތައިންސައްތަ އިސްލާމީ ޤައުމެއްގެ ގޮތުގައި 9 ޤަރުނު ފުރިގެންދިޔުމަކީ ދުނިޔޭގެ އެހެން އެއްވެސް ޤައުމަކަށް ލިބިފައިނުވާފަދަ ފަޚުރެއްކަމަށް ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުޙައްމަދު ވިދާޅުވެއްޖެއެވެ.

ރާއްޖެ އިސްލާމްވި ދުވަހުގެ މުނާސަބަތުގައި ދެއްވި މެސެޖެއްގައި އެކަމަނާ ފާހަގަކުރެއްވި ގޮތުގައި، ދިވެހިން މިހާތަނަށްވެސް ދެމިތިބީ އެއްބައިވަންތަކަމުގެ މަތިވެރި ނަމޫނާއެއްގެ ގޮތުގައެވެ.

Ad by Hajj Corporation

ހިޖުރައިން 548 ވަނަ އަހަރު (މީލާދީން 1153) ރާއްޖޭގެ ރަސްކަލުން އިސްލާމްދީން ޤަބޫލުކުރެއްވުމާއެކު މުޅި ޤައުމު އިސްލާމްދީނަށް ބަދަލުވެގެންދިޔައީ، މޮރޮކޯގެ މަޝްހޫރު ޢިލްމުވެރިޔާ އަބުުލް ބަރަކާތުލް ޔޫސުފުލް ބަރުބަރީ ރާއްޖެއަށް ގެނެސްދެއްވި ދީނީ ހިދާޔަތުގެ ސަބަބުންނެވެ. މި މަތިވެރި ނިޢުމަތަށްޓަކައި މާތްﷲގެ ޙަޟްރަތަށް ޙަމްދާއި ޝުކުރު ދަންނަވަމުން، ދިވެހިން އަބަދަށްމެ އިސްލާމީ ހިދާޔަތުގައި ލެހެއްޓެވުމަށް އެކަމަނާ ދުޢާކުރެއްވިއެވެ.
ރާއްޖޭގެ ޤާނޫނުއަސާސީ ބުނާގޮތުން ދިވެހިރައްޔިތަކަށް ވެވޭނީ މުސްލިމަކަށް ވެގެންކަމަށާއި، ޤާނޫނުތަކުގެ މައިގަނޑު އަސާސަކީ އިސްލާމީ ޝަރީޢަތްކަން ފާހަގަކޮށް، ރާއްޖެ އިސްލާމްވި ދުވަހުގެ ގޮތުގައި ކޮންމެ އަހަރަކުވެސް ފާހަގަކުރަމުން އަންނަނީ ރަބީޢުލްއާޚިރު މަހުގެ 2 ވަނަ ދުވަހެވެ.