ކަސްޓަމްސްގެ ތަފާސްހިސާބުތަކުން ދައްކާ ގޮތުގައި މިދިޔަ އަހަރު ރާއްޖެއަށް އެތެރެކުރި އުޅަނދުތަކުގެ ތެރޭގައި 15،551 ސައިކަލާއި 1،347 ކާރު ހިމެނެއެވެ. މި ތަފާސްހިސާބުތަކުގައި މާލޭގެ ވިޔަފާރި ބަނދަރުގެ އިތުރުން އެހެނިހެން ސަރަހައްދުތަކުގައި ހުރި ވިޔަފާރި ބަނދަރުތަކަށް އެތެރެކުރި އުޅަނދުތައްވެސް ހިމެނިފައިވާކަމަށް ކަސްޓަމްސްއިން މަޢުލޫމާތު ދެއެވެ.

ކޮންމެ އަހަރަކުވެސް ރާއްޖޭގައި އަލަށް 10،000 އަށްވުރެ ގިނަ އެއްގަމު އުޅަނދު ރަޖިސްޓަރީކުރެވޭ ކަމަށާއި، އޭގެ ތެރެއިން 90 ޕަސެންޓަކީ ސައިކަލު ކަމަށް ތަފާސްހިސާބުތަކުން ދައްކައެވެ. އަދި ރާއްޖެއަށް އެތެރެކުރާ އުޅަނދުތަކުގެ ތެރެއިން ގިނަ އުޅަނދުތައް ދުއްވަނީ މާލެ ސަރަހައްދުގައެވެ.

އެއްގަމު އުޅަނދުތަކުން މާލެ ތޮއްޖެހި، އެ މައްސަލަ ހައްލުކުރުމަށް ރާއްޖެއަށް އެއްގަމު އުޅަނދު އެތެރެކުރެވޭ އަދަދު ކޮންޓްރޯލް ކުރުމާ ގުޅޭގޮތުން އެކި ފަހަރު މަތިން ކަމާ ގުޅޭ އިދާރާތަކުން މަޝްވަރާކޮށްފައިވީ ނަމަވެސް، މިހާތަނަށް އެކަމަށް ޙައްލެއް ގެނެވިފައެއް ނުވާކަންވެސް ފާހަގަކުރެވެއެވެ.

ސަރުކާރުން ހާމަކުރައްވާފައިވާ ގޮތުގައި މިދިޔަ 5 އަހަރުދުވަހުގެ ތެރޭގައި ރާއްޖޭގައި 69،780 އުޅަނދު ރަޖިސްޓްރީކޮށްފައިވެއެވެ. މީގެ ތެރެއިން 42،000 އަށްވުރެ ގިނަ އުޅަނދަކީ މާލެ ސަރަހައްދުގައި ރަޖިސްޓްރީކޮށްފައިވާ އުޅަނދުތަކެވެ.

މާލެ ސަރަޙައްދަކީ ރާއްޖޭގެ އެންމެ ތޮއްޖެހުން ބޮޑު ސަރަޙައްދަށްވެހުރެ، މާލޭގައި ލައްކައަކަށްވުރެ ގިނަ އުޅަނދު ރަޖިސްޓްރީކުރެވިފަވެއެވެ. މިކަމުގެ ސަބަބުން މާލޭގެ މަގުތަކުގައި ޓްރެފިކް ޖެހުމާއި ޕާކިންގެ ދަތިކަން އިތުރުވަމުންދެއެވެ.