ޔުއެފާ ނޭޝަންސް ލީގުގައި ސަރބިއާގެ މައްޗަށް 2-1 އިން ކުރިހޯދައި، އާ ކޯޗު ޒަވީގެ އިރުޝާދުގެ ދަށުން ނެދަލޭންޑްސްއިން ފުރަތަމަ މޮޅު ހޯދައިފިއެވެ. ސްޓޭޑިއަން ރާޖްކޯ މިޓިކްގައި ކުޅުނު މި މެޗުގައި ނެދަލޭންޑްސްއަށް ކާމިޔާބީ ހޯދައިދިނީ ދެ ލަނޑުވެސް ޖަހައިދިން މެކްސް މިއަރޑިންކް އެވެ.

ޒަވީގެ ފުރަތަމަ މެޗުގައި ޖަރުމަނާ ދެކޮޅަށް ފަހު ވަގުތު ކޯޑީ ގަކްޕޯ ޖެހި ލަނޑުން 1-1 އިން އެއްވަރުވި ނަމަވެސް، މި މެޗުގައި ނެދަލޭންޑްސްއިން ވަނީ ވަރުގަދަ ކުޅުމެއް ދައްކައި މުހިންމު ތިން ޕޮއިންޓް ކަށަވަރުކޮށްފައެވެ. މެޗުގެ ފުރަތަމަ ހާފުގައި އަނިޔާގެ ސަބަބުން ގަކްޕޯ ބަދަލުކުރަން ޖެހުނު ނަމަވެސް، 30 ވަނަ މިނެޓުގައި ކްރައިސެންސިއޯ ސަމަރވިލްއަށް އޭރިއާ ތެރެއިން ކުރި ފައުލަކަށް ލިބުނު ޕެނަލްޓީން މިއަރޑިންކް ވަނީ ނެދަލޭންޑްސްއަށް ލީޑު ނަގައިދީފައެވެ.

Ad by Hajj Corporation

ދެވަނަ ހާފު ފެށިގެން 54 ސިކުންތުގެ ތެރޭގައި ސަރބިއާއިން ވަނީ ލޫކާ ޔޮވިޗް ކާމިޔާބުކުރި ލަނޑުން ނަތީޖާ ހަމަހަމަކޮށްފައެވެ. ނަމަވެސް، ނެދަލޭންޑްސްއިން ކުޅުން ވަރުގަދަކޮށް 69 ވަނަ މިނެޓުގައި ބަދަލު ކުޅުންތެރިޔާ ގޫސް ޓިލް ތަނަވަސްކޮށްދިން ފުރުސަތަކުން މިއަރޑިންކް ވަނީ އެ ޓީމުގެ ދެވަނަ ލަނޑު ޖަހައި އަލުން ލީޑު ހޯދައިދީފައެވެ.

އަނިޔާވި ޖަސްޓިން ކްލައިވަރޓް އަދި ޑޮންޔެލް މާލެންގެ ބަދަލުގައި ފަހު ވަގުތު ސްކޮޑަށް ނެގި މިއަރޑިންކް ވަނީ ލިބުނު ފުރުސަތުގެ ބޭނުން ފުރިހަމައަށް ހިފާފައެވެ. މި މޮޅާއެކު ގްރޫޕް އޭ2 ގެ އެއްވަނައަށް އެރި ނެދަލޭންޑްސް ދެން ބައްދަލުކުރާނީ މި ބުރާސްފަތި ދުވަހު ގްރީސްއާ ދެކޮޅަށެވެ.