ޔުއެފާ ނޭޝަންސް ލީގުގައި ނޯވޭގެ ކީޕަރު އޯޔަން ނީލަންޑް ހެދި ގޯހެއްގެ ފައިދާ ނަގައި، ގޮންސާލޯ ރާމޮސް ޖެހި ލަނޑުން 2-1 އިން ނޯވޭ ބަލިކޮށް ޕޯޗުގަލް އިން ގްރޫޕް އޭ4 ގެ އެއްވަނަ މަގާމު ދަމަހައްޓައިފިއެވެ. އުލެވާލް ސްޓޭޑިއަމްގައި ކުޅުނު މި މެޗުން މޮޅުވެ، ޕޯޗުގަލްގެ އާ ކޯޗު ޖޯޖް ޖީސަސްގެ އިރުޝާދުގެ ދަށުން އެ ޓީމު ވަނީ ޖެހިޖެހިގެން ދެވަނަ މޮޅު ހޯދާފައެވެ.
މިމެޗުގައި ހާލަންޑް އާއި ރޮނާލްޑޯގެ ކުރިމަތިލުން ފުރަތަމަ ފަހަރަށް ފެންނާނެކަމަށް ގިނަ ސަޕޯޓަރުން އުއްމީދުކުރިނަމަވެސް، ރޮނާލްޑޯ މެޗު ނިންމާލަންޖެހުނީ ބެންޗުންނެވެ.

މެޗުގެ ފުރަތަމަ ހާފުގައި ރަނގަޅު ކުޅުމެއް ދެއްކި ޕޯޗުގަލް އިން ލީޑު ނެގީ 17 ވަނަ މިނެޓުގައެވެ. ޕެޑްރޯ ނެޓޯ ދިން ބޯޅައަކުން ޕެނަލްޓީ އޭރިއާގެ ބޭރުގައި ހުރެ ތިރީ ކަނަށް ބޯޅަ ވައްދާލައިގެން މި ލަނޑު ޖަހައިދިނީ ޔާއޯ ފެލިކްސް އެވެ. ފުރަތަމަ ހާފު ނިމުމުގެ ކުރިން ނޯވޭގެ ތަރި އާލިން ހާލަންޑް ބޮލުން ފޮނުވާލި ދެ ހަމަލާއެއް ޕޯޗުގަލްގެ ކީޕަރު ޑިއޯގޯ ކޮސްޓާ ވަނީ ދިފާއުކޮށްފައެވެ.

Ad by Hajj Corporation

ދެވަނަ ހާފު ފެށިގެން ހަވަނަ މިނެޓުގައި ނޯވޭ އިން ވަނީ ނަތީޖާ ހަމަހަމަކޮށްފައެވެ. މާޓިން އޮޑެގާޑް ފޮނުވާލި ހިލޭޖެހުމެއް ކީޕަރު ކޮސްޓާ އަތުން ދޫވި ވަގުތު، ޕެޓްރިކް ބާގް ދިން ބޯޅަ ގޯލުގެ ތެރެއަށް ފޮނުވާލައިގެން މި ލަނޑު ކާމިޔާބުކުރީ ހާލަންޑެވެ. މިއީ އޭނާ އެންމެ ފަހުން ކުޅުނު 6 މެޗުގައި ޖެހި 10 ވަނަ ލަނޑެވެ. ނަމަވެސް، ނަތީޖާ ހަމަހަމަވިތާ ތިން މިނެޓު ފަހުން، ނޯވޭގެ ކީޕަރު ނީލަންޑް ހެދި ގޯހަކުން ލިބުނު ބޯޅަ، ރާމޮސް ވަނީ ކީޕަރުގެ ބޯމަތިން ގޯލުގެ ތެރެއަށް އޮއްސާލައި ޕޯޗުގަލް އަށް އަލުން ލީޑު ހޯދައިދީފައެވެ.

މެޗުގެ ފަހު 15 މިނެޓުގައި ނޯވޭ އިން ވަރުގަދަ ހަމަލާތަކެއް ފޮނުވި ނަމަވެސް، ކީޕަރު ކޮސްޓާގެ މޮޅު ސޭވްތަކާއެކު ޕޯޗުގަލް އިން ލީޑު ދިފާއުކުރިއެވެ. ކްރިސްޓިއާނޯ ރޮނާލްޑޯ ނުލައި ކުޅުނު މި މެޗުގައި ނޯވޭ އިން 22 ހަމަލާ އުފައްދައި މޮޅަށް ކުޅުނު ނަމަވެސް، ނަތީޖާ ނެރުމުގައި ކުރިހޯދީ ޗެމްޕިއަން ޕޯޗުގަލް އެވެ.