ތައިލެންޑަށް ބޯކޮށް ވާރޭވެހި، ފެންބޮޑުވުމުގެ ޙާދިސާގައި ލިބުނު ބޮޑެތި ގެއްލުންތަކާ ގުޅިގެން، އެޤައުމުގެ ބޮޑުވަޒީރު ހިޒްއެކްސަލަންސީ އަނުތިން ޗާންވިރަކުލްއަށް، ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ތަޢުޒިޔާގެ މެސެޖެއް ފޮނުއްވައިފިއެވެ. ރައީސުލްޖުމްހޫރިއްޔާގެ މެސެޖުގައި، ދިވެހި ސަރުކާރާއި ރައްޔިތުންގެ ނަމުގައި، ތައިލެންޑުގެ ބޮޑުވަޒީރަށާއި ސަރުކާރަށް އަދި ރައްޔިތުންނަށް، ޚާއްޞަކޮށް ފުރާނަ ގެއްލިދިޔަ ފަރާތްތަކުގެ ޢާއިލާތަކަށް އިޚްލާޞްތެރި ތަޢުޒިޔާ އަރިސްކުރައްވާފައިވެއެވެ.

ސެޕްޓެމްބަރު 16 އިން ފެށިގެން ތައިލެންޑުގެ 41 ޕްރޮވިންސަކަށް މި ފެންބޮޑުވުމުގެ އަސަރުކޮށްފައިވާއިރު، މި ކާރިސާގައި މިހާތަނަށް މަދުވެގެން 8 މީހުން ވަނީ މަރުވެފައެވެ. އަދި 580,000 އަށްވުރެ ގިނަ ގެދޮރަށް ވަނީ އެކިވަރުގެ ގެއްލުންތައް ވެފައެވެ. މިދިޔަ ހަފްތާ ބަންދުގައި މެދުކެނޑުމެއްނެތި ބޯކޮށް ވާރޭވެހުމުގެ ސަބަބުން ވެރިރަށް ބެންކޮކްގެ ބޮޑު ސަރަޙައްދެއްގައި ފެންބޮޑުވެ، އެތައް މިލިއަން ޑޮލަރެއްގެ ގެއްލުންތައް ވަނީ ލިބިފައެވެ. ބެންކޮކް ސިޓީ އެޑްމިނިސްޓްރޭޝަނުން މަޢުލޫމާތު ދޭ ގޮތުގައި، އެ ސިޓީން އެކަނިވެސް މަދުވެގެން 5,901 މީހަކު ވަނީ 234 ވަގުތީ ހިޔާތަކަށް ބަދަލުކޮށްފައެވެ.

Ad by Hajj Corporation

މިދިޔަ ހަފްތާގެ ދެތިން ދުވަހުގެ ތެރޭގައި އެކަނިވެސް 320 މިލިމީޓަރުގެ ވާރޭ ވެހިފައިވާ ކަމަށް ރެކޯޑު ކުރެވިފައިވާއިރު، މިއީ އާންމުކޮށް މުޅި ސެޕްޓެމްބަރު މަހު އެ ސަރަޙައްދަށް ވެހޭ ވާރޭގެ މިންވަރާ އެއްވަރުގެ ޢަދަދެކެވެ. އިރުމަތީ ޕްރޮވިންސެއް ކަމަށްވާ ރަޔޮންގްގެ ދެ ކޯރެއް ފުރިގެން ބަންޑުންވާން ފެށުމާ ގުޅިގެން އެ ސަރަޙައްދުގައި ދިރިއުޅޭ މީހުން ވަގުތުން ރައްކާތެރި ހިސާބުތަކަށް ބަދަލުވުމަށް ކަމާބެހޭ އިދާރާތަކުން ވަނީ އަންގާފައެވެ.

ތައިލޭންޑުގެ ދާޚިލީ ވުޒާރާއިން ނެރުނު ބަޔާނެއްގައި ބުނީ، ފެންބޮޑުވެފައިވާ ސަރަޙައްދުތަކުގައި 80،000 އަށްވުރެ ގިނަ މީހުން ގެއިން ބޭރަށް ނުނުކުމެވި ތާށިވެފައިވާ ކަމަށެވެ. އެ ފަރާތްތަކަށް އެހީތެރިކަން ފޯރުކޮށްދިނުމަށް ޚާއްސަ އުޅަނދުފަހަރު ބޭނުންކުރަމުން އަންނައިރު، ސަރުކާރުގެ އަމާޒަކީ ފެންބޮޑުވެފައިވާ މުއްދަތާއި، ފެންހިނދޭފަހުން މަދުވެގެން ހަތް ދުވަހުގެ މުއްދަތަކަށް ހާލުގައި ޖެހިފައިވާ ހުރިހާ ފަރާތްތަކަށް ދުވާލަކު ތިން އިރުގެ ކާނާ ފޯރުކޮށްދިނުމެވެ.

ރައީސުލްޖުމްހޫރިއްޔާގެ މެސެޖު ނިންމަވާލައްވަމުން ވަނީ މި ޙާދިސާގައި އަނިޔާވި ފަރާތްތަކަށް އަވަސް ޝިފާއަކަށް އެދިވަޑައިގެންފައެވެ. އަދި މިކާރިސާއިން އަރައިގަތުމަށް ކުރިއަށްދާ މަސައްކަތްތައް ހުރަހެއްނެތި ކުރިއަށްގޮސް، އެހީތެރިކަން ބޭނުންވާ ފަރާތްތަކަށް އަވަސް ތަސައްލީއެއް ލިބިގެންދާނެ ކަމަށް އުންމީދުކުރައްވާ ކަމަށްވެސް އެމަނިކުފާނު ވިދާޅުވިއެވެ.