ކޮންމެ ދިވެއްސަކަށް ފައިދާ ބަހާ ގޮތަށް ސަރުކާރުން 10 ރިސޯޓު ތަރައްގީ ކުރުމަކީ ރާއްޖޭގެ ޓޫރިޒަމަށް އަންނާނެ ވަރަށް ބޮޑު ބަދަލެއް ކަމަށާއި އެއީ ކާމިޔާބު މަޝްރޫއަކަށް ވާނެ ކަމަށް ދިވެހިރާއްޖޭގެ ފަތުރުވެރިކަމުގެ ދާއިރާގައި ފާހަގަކޮށްލެވޭ އެންމެ ތަޖުރިބާކާރު އެއް ވިޔަފާރިވެރިޔާ އަދި ކްރައުން ކުންފުނީގެ ޗެއާޕާސަން ހުސައިން އަފީފު (ޗަމްޕާ އަފީފު) ވިދާޅުވެއްޖެ އެވެ.

ގައުމީ ޓޫރިޒަމް ދުވަސް ފާހަގަކުރުމަށް ބޭއްވި ރަސްމިއްޔާތެއްގައި ވާހަކަދައްކަވަމުން އަފީފު ވަނީ ސަރުކާރުގެ މި މަޝްރޫއަށް ފުރިހަމަ ތާއީދު އޮތްކަން ހާމަކުރައްވައި، މިކަމުގައި ބައިވެރިވެވަޑައިގަންނަވަން ބޭނުންފުޅުވާ ކަމަށް ވިދާޅުވެފައެވެ. އަދި މި މަޝްރޫއު ކާމިޔާބުވާނެ ކަމަށް ވަރަށް ބޮޑަށް އުންމީދު ކުރައްވާ ކަމަށްވެސް އެމަނިކުފާނު ފާހަގަކުރެއްވިއެވެ.

Ad by Hajj Corporation

ސަރުކާރުން މީގެ ކުރިން އިއުލާންކޮށްފައިވާ ގޮތުގައި، ސަރުކާރުގެ ކުންފުންޏަކުން ކުރިއަށް އޮތް ތިން އަހަރުގެ ތެރޭގައި 10 ރަށެއްގައި ރިސޯޓު ތަރައްގީކޮށް، އެ ތަންތަނުން ލިބޭ ފައިދާއިން ކޮންމެ ދިވެހި ރައްޔިތަކަށް އަހަރަކު 400 ޑޮލަރު ދޭން ފަށާނެއެވެ. އަދި މި 10 ރިސޯޓުގެ ހިއްސާދާރުންނަކީ ދިވެހިން ކަމުގައި ހެދުމަށްޓަކައި ގާނޫނަކުން އެކަން ހަމަޖައްސަވާނެ ކަމަށް ރައީސް ޑރ. މުހައްމަދު މުއިއްޒު ވަނީ މީގެ ކުރިން ވިދާޅުވެފައެވެ.

އަފީފު އިތުރަށް ފާހަގަކުރެއްވި ގޮތުގައި، ރާއްޖޭގެ ޓޫރިޒަމް ދާއިރާ މިހާ ހިސާބަށް އައީ ސަރުކާރާއި އަމިއްލަ ފަރާތްތައް ގުޅިގެން ކުރި މަސައްކަތުން ކަމަށާއި، ކުރިއަށް އޮތްތަނުގައިވެސް ދާއިރާ ކުރިއަށް ގެންދެވޭނީ އެގޮތުގެ މަތިންނެވެ. ހަމައެއާއެކު، ދާއިރާގެ އެކި ފެންވަރުގައި މަސައްކަތްކުރާ މުވައްޒަފުން އާއިލާއާ ދުރުގައި ކުރާ ބުރަ މަސައްކަތް އެމަނިކުފާނު ވަނީ ވަރަށް ބޮޑަށް ފާހަގަކުރައްވާފައެވެ.