އިސްރާއީލުން މިއަދު ހެނދުނު އީރާނަށް ބޮން އެޅުމާއި ގުޅިގެން އެކަން ދިވެހިރާއްޖެއިން ކުށްވެރިކޮށްފިއެވެ.

މިއަމަލު ކުށްވެރިކޮށް ރާއްޖެއިން ނެރުނު ބަޔާނުގައި ވަނީ އިސްރާއީލުން ދާދިފަހުން އިސްލާމިކް ރިޕަބްލިކް އޮފް އީރާނަށް އަމާޒުކޮށްގެން ދިން އަސްކަރީ ހަމަލާތަކަކީ އީރާނުގެ އިސްތިގުލާލާއި ބައިނަލްއަގްވާމީ ގާނޫނުތަކާ ހިލާފު ހަމަލާތަކެއް ކަމަށެވެ. މީގެ ސަބަބުން މުޅި ސަރަޙައްދުގެ ޤައުމުތަކާއި ރައްޔިތުންގެ ސަލާމަތަށް ނުރައްކާވެފައިވާ ކަމަށާއި އަދި މިހާރޮ އޮތް ޢަދާވާތްތެރިކަން ނައްތާލުމަށް ރާއްޖޭގެ ސަރުކާރުން ވަނީ ގޮވާލާފައެވެ.

އަދި މި ސަރަހައްދުގެ ޤައުމުތަކާއި ރައްޔިތުންގެ ސަލާމަތަށް ނުރައްކާވެ، ނުތަނަވަސްކަން އިތުރުވެފައިވާ ދަނޑިވަޅުގައި މިހާރު މެދުއިރުމަތީގައި ހިންގަމުންދާ ހަމަނުޖެހުންތައް ވަގުތުން ހުއްޓާލުމަށް ދިވެހި ސަރުކާރުން ވަނީ ގޮވާލާފައެވެ.

މިކަމުގައި ޝާމިލްވާ އެންމެހާ ފަރާތްތަކުން ސުލްހަވެރި ގޮތްތައް އިސްކުރުމަށް ދިވެހި ސަރުކާރުން ވަނީ އިލްތިމާސްކޮށްފައެވެ. އަދި އެ ސަރަޙައްދުގައި ދެމެހެއްޓެނިވި ޞުލްޙަ ޤާއިމުކުރުމަށްޓަކައި މިހާރުން މިހާރަށް ހަނގުރާމަ ހުއްޓާލުމަށާއި މަޝްވަރާތައް އިތުރުކުރުމަށް ކުރަމުންދާ މަސައްކަތްތަކަށް އެއްބާރުލުން ދިނުމަށް ބައިނަލްއަޤްވާމީ މުޖުތަމަޢަށް ރާއްޖެއިން ވަނީ ގޮވާލާފައެވެ.

އިސްރާއީލުނ އީރާނަށް ސީދާ ހަމަލާތަކެއް ދީފައިވަނީ މި މަހުގެ ކުރީކޮޅު ތެހެރާނުން ފޮނުވާލި ބެލިސްޓިކް މިސައިލް ބެރޭޖަށް ރައްދު ދިނުމުގެ ގޮތުންނެވެ. އީރާނުން ބުނީ އިސްރާއީލުން ފަލަސްތީނަށް ދެމުން އަންނަ ހަމަލާތައް ހުއްޓާ ނުލަންދެން އިސްރާއިލަށް ހަމަލާ ދޭނެ ކަމަށެވެ. އަދި އިސްރާއީލުން އީރާނަށް ހަމަލާ ދީފިނަމަ އިސްރާއީލުގެ ގޭސް ރައްކާ ކުރާ ތަންތަނަށާއި ހަކަތައިގެ މަރުކަޒުތަކަށް ވަރުގަދަ ހަމަލާތައް ދޭނެ ކަމުގެ އިންޒާރުވެސް އީރާނުން ވަނީ ދީފައެވެ.