އިސްރާއީލާއި ހިފާފައިވާ އިރުމަތީ ގުދުސްގައި ފަލަސްތީނުގެ ރެފިއުޖީ އެޖެންސީ (އުންރުވާ) ހިންގުން މަނާކުރާ ގާނޫނެއް ތިން މަސް ދުވަހުގެ ތެރޭގައި ފާސްކުރުމަށް އިސްރާއީލުގެ ގާނޫނު ހަދާ މަޖިލީހުން ވޯޓު ދީފިއެވެ.

މިއީ އިސްރާއީލުގެ ބާރުގެ ދަށުގައި ވާ ސަރަހައްދުތަކުގައި ފަލަސްތީނުގެ ރެފިއުޖީންނަށް އެހީވުމުގެ ހުއްދަ ޔޫއެންއާރްޑަބްލިއުއޭއަށް 1967 ވަނަ އަހަރު ދިން އެއްބަސްވުން ބާތިލުކުރުމަށް ނަގާ ފިޔަވަޅެކެވެ.

Ad by Hajj Corporation

އެ ގާނޫނުގައި އުންރުވާގެ މުވައްޒަފުންނާއި އިސްރާއީލުގެ އޮފިޝަލުންނާ މުއާމަލާތްކުރުން ވަނީ މަނާކޮށްފައެވެ.

ޔޫއެންއާރްޑަބްލިއުއޭގެ އޮފިޝަލުންނާއި ބައިނަލްއަގްވާމީ އެކި ސަރުކާރުތައް ހިމެނޭ ގޮތަށް ފާޑުކިޔާ ފަރާތްތަކުން ވަނީ މި ގާނޫނު ކުށްވެރިކޮށް އެ އެޖެންސީގެ ހިދުމަތަށް ބަރޯސާވާ ފަލަސްތީނުގެ އެތައް މިލިއަން ބައެއްގެ ތައުލީމާއި ސިއްހަތް އަދި ދިރިއުޅުމަށް ވަރަށް ބޮޑަށް އަސަރު ކުރާނެ ކަމަށް ބުނެފައެވެ. އެމެރިކާގެ ޚާރިޖީ ވުޒާރާއިން ވަނީ އިންސާނީ އެހީތެރިކަން ފޯރުކޮށްދިނުމުގައި، ޚާއްޞަކޮށް ޣައްޒާއަށް އިންސާނީ އެހީތެރިކަން ފޯރުކޮށްދިނުމުގައި ޔޫ.އެން.އާރު.ޑަބްލިއު.އޭ.ގެ މުހިންމު ދައުރަށް އަލިއަޅުއްވާލައްވައި ކަންބޮޑުވުން ފާޅުކުރައްވާފައެވެ.

އިސްރާއީލުން ހިފާފައިވާ ހުޅަނގު އައްސޭރީގައާއި، އިރުމަތީ ގުދުސް އާއި ޣައްޒާ ހިމެނޭ ސަރަހައްދުގައި ގާތްގަނޑަކަށް ދެ މިލިއަނަށްވުރެ ގިނަ މީހުން އުންރުވާގައި ރަޖިސްޓްރީކޮށްފައިވެއެވެ.

އިސްރާއީލުން ޣައްޒާއަށްދޭ ހަމަލާތަކުގައި މިހާތަނަށް 42،710 މީހުން ވަނީ ޝަހީދުކޮށްލާފައެވެ.