ޒަމާނީ ފެންވަރަށް މާލޭގެ މަގުތައް ހަދާނެ ކަމަށް ރައީސުލް ޖުމްހޫރިއްޔާ ޑރ. މުހައްމަދު މުޢިއްޒު ވިދާޅުވި މަޝްރޫއު އަންނަ އަހަރަށް ފަސްވެއްޖެއެވެ.

އިއްޔެ ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ނޫސްވެރިޔަކު ކުރެއްވި ސުވާލަކަށް ޖަވާބުދެއްވަމުން ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބު ވިދާޅުވީ ސަރުކާރުން މިއަހަރުގެ ތެރޭގައި މަސައްކަތް ފަށަން މަސައްކަތް ކުރާ ކަމަށެވެ. ނަމަވެސް މިފަދަ މަޝްރޫއެއް ކުރިއަށް ގެންދިޔުމުގައި ކަޑައްތުކުރަން ޖެހޭ މަރުހަލާތައް ހުރުމާއި، މި މަޝްރޫއަކީ ޗައިނާގެ ހިލޭ އެހީގެ ދަށުން ކުރިއަށް ގެންދާ މަޝްރޫއަކަށް ވުމާއިއެކު އެ ކަންކަމަކީ ސީދާ ދިވެހި ސަރުކާރުގެ ކޮންޓްރޯލް އޮތް ކަންކަމެއް ނޫން ކަމަށެވެ.

ވަޒީރު ވިދާޅުވި ގޮތުގައި، އެ މަޝްރޫއުގެ ޕްރީ ފީޒިބިލިޓީ ސްޓަޑީތައް ހެދުމަށްޓަކައި ޗައިނާގެ ޓީމެއް މި އަންނަ މަހުގެ ކުރީކޮޅު ރާއްޖެ އަންނާނެއެވެ. އަދި އެ ޓީމު 20 ދުވަސް ވަންދެން ރާއްޖޭގައި މަސައްކަތްކުރުމަށް ފަހު، އެ މަޝްރޫއުގެ ޓެންޑަރިން މަރުހަލާއަށް ހުޅުވާލާނެއެވެ. ވަޒީރު ވިދާޅުވި ގޮތުގައި، ސަރުކާރުގެ އަމާޒަކީ މި އަންނަ އަހަރުގެ މެދު ތެރޭގައި އެ މަޝްރޫއުގެ އަމަލިީ މަސައްކަތް ފެށުމެވެ.

ވަޒީރު އެފަދައިން ވިދާޅުވިއިރު، މިއަހަރުގެ ޖެނުއަރީ މަހުގައި ރައީސް ޗައިނާއަށް ކުރެއްވި ދަތުރުފުޅުގައި، އެ ޤައުމުން ރާއްޖެއަށް ދޭން ނިންމި 130 މިލިއަން ޑޮލަރުގެ ބޮޑުބައެއް ހޭދަކުރުމަށް ނިންމާފައިވަނީ މާލޭގެ މަގުތައް ޒަމާނީ ފެންވަރަށް ހެދުމަށް ކަމަށް ކުރިން ރައީސް ވަނީ ވިދާޅުވިއެވެ.

މީގެއިތުރުން ރައީސް ވަނީ މިއަހަރު ތެރޭގައި އެ މަަޝްރޫޢު ފެށޭނެ ކަމަށް މަޖިލިސް ހުޅުވުމަށް މިއަހަރުގެ ފެބްރުއަރީގައި ބޭއްވި ޖަލްސާގައި ރައީސް އިއްވެވި ރިޔާސީ ބަޔާނުގައި ވެސް ވިދާޅުވެފައެވެ. އެގޮތުން މި މަޝްރޫއާ ގުޅޭގޮތުން އިތުރަށް މަޝްވަރާ ކުރުމަށްޓަކައި މިއަހަރުގެ މާޗް މަހު ޗައިނާގެ ޓީމެއް ވެސް ވަނީ ރާއްޖެ އަށް ވަނީ އައިސްފައެވެ.