މި އަހަރުގެ ބަޖެޓުގައި ހިމެނި 39 ބިލިއަން ރުފިޔާގެ މަޝްރޫއުތަކުގެ ތެރެއިން، އެ މަޝްރޫއުތަކަށް ބަޖެޓުކުރީ އެންމެ 3.6 ބިލިއަން ރުފިޔާ ކަމުގައި ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބު މިއަދު ވިދާޅުވެއްޖެއެވެ.

ރައީސުލްޖުމްހޫރިއްޔާގެ އޮފީހުގައި މިއަދު އޮތް ނޫސްވެރިންގެ ބައްދަލުވުމުގައި ވަޒީރު ވިދާޅުވީ، މި ސަރުކާރުގައި ބައެއް ގިނަ މަޝްރޫއުތައް ނުފެށެނީ، އެ މަޝްރޫއުތަކަށް ބަޖެޓު ކަނޑައަޅާފައިނުވާތީ ކަމަށެވެ. އެގޮތުން ގިނަ މަޝްރޫއުތަކަށް މަދުން ބަޖެޓު ކަނޑައެޅިފައި އޮތް އޮތުން ވަޒީރު ސިފަ ކުރެއްވީ "ބައިކުޅަ ބައި"ގެ ގޮތުގައެވެ.

މިއީ 2024ގެ ޕްރޮޖެކްޓްތައް ހިންގަން ބޭނުންވާ އަދަދުގެ ބައިކުޅަ ބައި. އަޅުގަނޑުމެން ގަބޫލުކުރަނީ ގާތްގަޑަކަށް %15 އާއި %20އާ ދެމެދުގެ އަދަދެއް ކަމަށް. އަޅުގަނޑުމެންނާ އެންމެ ބޮޑަށް ކުރެވޭ ސުވާލަކީ ކީއްވެގެންތޯ ޕްރޮޖެކްޓުތައް ނުހިނގަނީ. ވަރަށް ބައިވަރު ޕްރޮޖެކްޓުތަކެއް ހިންގާ. އެހެން ނަމަވެސް ވަރަށް ބައިވަރު ޕްރޮޖެކްޓުތައް ނުހިނގާ ތަން ވެސް ފެންނާނެ. އޭގެ ސާފު ޖަވާބަކީ، ސޮއިކޮށްފައި ހުރި ޕްރޮޖެކްޓުތައް ކުރިއަށްގެންދިއުމަށް ބޭނުންވާ ފައިސާ މި ދެންނެވި ގޮތަށް ބައިކުޅަ ބައެއް ބަޖެޓުގައި ހިމެނިފައި އޮތުން. އަޅުގަނޑުމެންނަށް ހަރަދުކުރެވެން އަންނަނީ ގާނޫނުގައި ވެސް ވާ ގޮތުން ބަޖެޓުން ކަނޑައަޅާފައިވާ އަދި އެ ފައިސާ ލިބޭ މިންވަރަކަށް ބަލާފައި- ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބު

ވަޒީރު ވިދާޅުވީ، އެހެން ނަމަވެސް، ސަރުކާރުގެ އަމާޒަކީ އެ މަޝްރޫއުތައް ހުއްޓާނުލައި ކުރިއަށްގެންދެވޭނެ ގޮތެއް ހޯދައި، މުހިންމު މަޝްރޫއުތައް ނަމަވެސް ކުރިއަށް ގެންދިޔުން ކަމަށެވެ. އެގޮތުން މި ސަރުކާރު އައި ފަހުން، 37 މަޝްރޫއެއް ނިންމާފައިވާ ކަމަށާއި، އެ މަޝްރޫއުތަކުގެ އަގު 1.97 ބިލިއަން ރުފިޔާގެ އަށް އަރާ ކަމަށް ވެސް ވަޒީރު ވިދާޅުވިއެވެ.

ވަޒީރު ވިދާޅުވި ގޮތުގައި، މިހާތަނަށް މުޅި ޖުމްލަ 322 މަޝްރޫއެއްގައި އެ ވުޒާރާއިން ވަނީ ސޮއިކޮށްފައެވެ. އޭގެ ތެރޭގައި ހިމެނެނީ، އެއާޕޯޓު އެޅުމުގެ 9 މަޝްރޫއު، އެއް ބުރިޖު، ބިން ހިއްކުމުގެ 29 މަޝްރޫއެއް، މަގު ހެދުމުގެ 42 މަޝްރޫއެއް، ބަނދަރު ހެދުމުގެ 85 މަޝްރޫއެއް، ގޮނޑުދޮށް ހިމާޔަތްކުރުމުގެ 44 މަޝްރޫއެއް އަދި ފެނާއި ނަރުދަމާގެ 102 މަޝްރޫއެކެވެ.