މާލޭގައި އެންމެ ބޮޑަށް ފެންބޮޑުވާ އައިޖީއެމްއެޗް ސަރަހައްދުގައި ޑްރެއިން ސިސްޓަމް ގާއިމުކުރީ ސީދާ ރައީސުލްޖުމްހޫރިއްޔާ ޑރ. މުހައްމަދު މުޢިއްޒުގެ އެންގެވުމަށް، ޑިފެންސް މިނިސްޓްރީ އިސްވެ، އިންފްރާސްޓްރަކްޗަރ މިނިސްޓްރީ އާއި ގުޅިގެން އާރުޑީސީ މެދުވެރިކޮށް ކަމަށާއި، އަދި މި މަޝްރޫޢުން ނިމިފައި ވަނީ އެއްބައިކަމަށް މިނިސްޓަރ އޮފް ކޮންސްޓްރަކްޝަން އެންޑް އިންފްރާސްޓްރަކްޗަރ ޑރ. ޢަބުދުﷲ މުއްޠަލިބް އިއްޔެ ވިދާޅުވެއްޖެއެވެ.

ސަރުކާރުގެ މައި ހޮސްޕިޓަލް ހުންނަ އައިޖީއެމް ސަރަހައްދަކީ ވާރޭ ވެހިއްޖެނަމަ ވަރަށް އަވަހަށް ފެން ބޮޑުވާ ސަރަހައްދެކެވެ. އައިޖީއެމްއެޗްގެ އިތުރުން ހިރިޔާ ސްކޫލާއި، ތާޖުއްދީން ސްކޫލް ހިމެނޭ އެ ސަރަހައްދުގައި ވާރޭ ވެހެން ފަށާތާ 15 ވަރަކަށް މިނިޓްތެރޭ ފެން ބޮޑުވެއެވެ. އެހެންވެ މި ކަމަކީ ރައްޔިތުންނާއި، ޚިދުމަތްތެރީންނަށް ވެސް ވަރަށް ތަކުލީފު ބޮޑުކަމެކެވެ.

މިކަން ހައްލުކުރުމަށް އެ ސަރަހައްދުގައި ގާއިމުކުރި ޑްރެއިން ސިސްޓަމް އިއްޔެ ވެހުނު ވާރެއާއި ގުޅިގެން ވަނީ ބޭނުންކުރަން ފަށާފައެވެ. އަދި މި ސިސްޓަމްގެ ސަބަބުން ކުރިން އެ ސަރަހައްދަށް ދިމާވާ މައްސަލަ ހައްލުވެގެން ދިޔައެވެ.

މިކަމާއިގުޅިގެން އިންފްރާސްޓްރަކްޗަރ މިނިސްޓަރު އަބުދުﷲ މުއްތަލިބް ވިދާޅުވީ، އެއީ މާލޭގެ ހުޅަނގު ސަރަޙައްދުގައި، ވަކިން ޚާއްޞަކޮށް ވެސްޓް ޕާކާއި، އައި.ޖީ.އެމް. ހޮސްޕިޓަލް ހިމެނޭ ސަރަޙައްދުގައި ފެން ބޮޑުވެ ޢާންމު ދިރިއުޅުމަށް ދަތިވެ، ބައެއް ގެތަކަށް ގެއްލުން ލިބޭތީ މާލޭގެ މަގުތައް ރަނގަޅު ފެންވަރަކަށް ހެދެންދެން ވަގުތީ ގޮތުން އެކަން ޙައްލު ކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެންގެވުމާ ގުޅިގެން ކުރަން ފެށި މަސައްކަތެއްގެ ބައެއް ކަމަށެވެ.

''މިއީ މިނިސްޓްރީ އޮފް ޑިފެންސް އިސްވެ މިނިސްޓްރީ އޮފް ކޮންސްޓްރަކްޝަން އެންޑް އިންފްރާސްޓްރަކްޗަރގެ ބައިވެރިވުމާއެކު އާރު.ޑީ.ސީ އާ ޙަވާލުކުރެވި 10 މެއި 2024 ގައި ފަށައިގެން ކުރިއަށް ގެންދާ މަޝްރޫއެއް، މިހާތަނަށް މި މަޝްރޫއުން ނިމިފައިވަނީ ބައެއް'' މިނިސްޓަރު ވިދާޅުވެފަވެއެވެ.

މި ކުރެވޭ މަސައްކަތުން ފެންބޮޑުވާ މައްސަލައަށް އެއްކޮށް ޙައްލު ނުލިބުނު ނަމަވެސް މާލޭގެ މަގުތައް ރަނގަޅު ފެންވަރަކަށް ހެދެންދެން ރައްޔިތުންނަށް ފޯރާ ދަތިތައް ކުޑަކުރެވި ޕަންޕު ބޭނުންކޮށްގެން ފެން ހިންދުމަށް ފަސޭހަވެގެންދާނެކަން މިނިސްޓަރު ވަނީ ފާހަގަކުރަށްވާފައެވެ.

މިނިސްޓަރު ވިދާޅުވީ، މާލޭގެ އެކި ސަރަޙައްދުތަކުގައި ބެހެއްޓިފައިވާ ސްޓޯމްވޯޓަރ މެނޭޖްމަންޓް ސިސްޓަމް މެއިންޓެއިންކޮށް ބަލަހައްޓަނީ މިނިސްޓްރީ އޮފް ކޮންސްޓްރަކްޝަން އެންޑް އިންފްރާސްޓްރަކްޗަރއިން ކަމަށެވެ.