ދައުލަތުގެ އެއްވެސް ބާރެއްގެ، ނުވަތަ މިނިވަން މުއައްސަސާއެއްގެ، ނުވަތަ އިންތިޚާބު ކުރެވޭ އެއްވެސް ބައެއްގެ ބާރުތަކުގެ ތެރެއަށް މިހާތަނަށް އެއްވެސް ވަރެއްގެ ނުފޫޒެއް ފޯރުއްވާފައިނުވާނެ ކަމަށާއި އަދި ކުރިއަތް އޮތް ތަނުގައި ވެސް އެފަދަ ކަމެއް ނުކުރައްވާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ އެކްސްގައި ކުރެއްވީ ޕޯސްޓެއްގައެވެ.

ރައީސް ވިދާޅުވީ މިދެންނެވި މުއައްސަސާތަކުން އޭގެ ބަދަލުގައި، ޢަދުލުވެރިކަމާއި، އިންސާފާއި، ހަމަހަމަކަމާއެކު، ވަކި މީހަކަށް ބެލުމެއްނެތި، ހަލުއި ދުވެލީގައި މަސައްކަތްކުރަމުން ދޭތޯ ކަށަވަރުކުރުމާއި އެ މަގަށް ކަންކަން ބައްޓަން ކުރުމަށް ކުރަންޖެހޭ އެންމެހާ ކަންކަން ކުރުމަށް، ޤާނޫނާއި ޤަވާޢިދަށް ގެންނަންޖެހޭ އިސްލާހެއްވާނަމަ އެ އިސްލާޙެއް ގެންނަން ސަރުކާރުން ހުށަހަޅަމުން ގެންދާނެ ކަމަށެވެ.

ރައީސް ވަނީ ގައުމުގެ މާލީ ހާލަތު ރަނގަޅުކުރެއްވުމުގެ ގޮތުން މުހިއްމު ނިންމުންތަކެއް ނިންމާވާފައެވެ. އެގޮތުން ސިޔާސީ ވަޒީފާތައް މަދު ކުރެއްވުމަށް ނިންމަވައި ފަތުރުވެރިކަމުގެ ސިނާއަތުން ލިބޭ މަންފާ އިތުރުކުރެއްވުމުގެ ގޮތުން ފަތުރުވެރިންގެ އަތުން ނެގޭ ގްރީން ޓެކްސް ބޮޑު ކުރައްވާފައެވެ. މީގެ އިތުރުން އެމަނިކުފާނުގެ މުސާރައިން ދެބައިކުޅަ އެއްބައި ނުނަންގަވަން ވެސް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވަނީ ނިންމަވާފައެވެ.