އަންނަ 2025 ވަނަ އަހަރު ރާއްޖެއަށް 2.2 މިލިއަން ފަތުރުވެރިން ޒިޔާރަތްކުރާނެ ކަމަށް ސަރުކާރުން ލަފާކޮށްފި އެވެ.

ފިނޭންސް މިނިސްޓްރީން އާންމުކުރި "މެދުރާސްތާގެ ދަރަނީގެ ސްޓްރެޓަޖީ 2025 - 2027" ގައި 2025 ވަނަ އަހަރު ރާއްޖެ އަށް ޓޫރިސްޓުން ޒިޔާރަތްކުރާ މިންވަރު 10.7 އިންސައްތަ އިތުރުވެ، 2.23 މިލިއަން ޓޫރިސްޓުން ޒިޔާރަތްކުރާނެ ކަމަށް އަންދާޒާކޮށްފައިވެއެވެ.

މިގޮތަށް ލަފާކޮށްފައި ވަނީ މި އަހަރުގެ ފަހުކޮޅު ވެލާނާ އިންޓަނޭޝަނަލް އެއާޕޯޓް (ވީއައިއޭ)ގެ އާ ޓާމިނަލް ހުޅުވުމުން އަންނާނެ ކުރިއެރުމަށް ރިޢާޔަތްކޮށްފައެވެ.

2025 ވަނަ އަހަރު ޓޫރިސްޓުން ޒިޔާރަތްކުރާ އަދަދު އިތުރުވުމުގެ ސަބަބުން ބެޑްނައިޓްސް އިތުރުވާ މިންވަރު 8.3 ޕަސެންޓް އިން ކުރި އަރާނެ ކަމަށް އަންދާޒާ ކުރެވޭ ކަމަށް ފިނޭންސުން ވަނީ ލަފާކޮށްފައެވެ.

ޓޫރިޒަމް މިނިސްޓްރީން އެންމެ ފަހުން އާންމުކުރި ތަފާސް ހިސާބުދައްކާގޮތުން މި އޮކްޓޯބަރު މަހުގެ 26 ގެ ނިޔަލަށް މިއަހަރު ރާއްޖެ އަށް ވަނީ 1.63 މިލިއަން ޓޫރިސްޓުން ޒިޔާރަތްކޮށްފައެވެ. މިއީ މިދިޔަ އަހަރުގެ މި މުއްދަތުގައި ޒިޔާރަތްކުރި 1.49 މިލިއަން ފަތުރުވެރިންނާ އަޅާބަލާއިރު 140،000 ފަތުރުވެރިން އިތުރުވުމެކެވެ.