ބޭންކް އޮފް މޯލްޑިވްސް (ބީއެމްއެލް) އިން ރާއްޖެއިން ބޭރުގައި ތައުލީމް ހާސިލްކުރަމުންދާ ދަރިވަރުންނަށް އެ ދަރިވަރުންނަށް ދިރިއުޅޭ ގައުމުގައި ޑެބިޓު ކާޑުން ކުރެވޭ ބޭރު ފައިސާގެ މުޢާމަލާތް އިތުރު ކުރުމަށް އެދުމުގެ ފުރުސަތު މިއަދުން ފެށިގެން ހުޅުވާލައިފިއެވެ.

މިއަދު ނެރުނު ބަޔާނެއްގައި ބޭންކުން ބުނީ، ރާއްޖެއިން ބޭރުގައި ކިޔަވާ ކުދިންނަށް ދެމުން އަންނަ ކާޑު ލިމިޓް، މިދިޔަ މަހުގެ 23 ވަނަ ދުވަހު އިތުރުކޮށްދީފައިވާ ކަމަށާއި، އެ ލިމިޓު އިތުރުކުރުމަށް ބޭނުންވާ ދަރިވަރުން އޮންލައިން ޕޯޓަލް އެއް މެދުވެރިކޮށް ރަޖިސްޓްރީ ވާން މިއަދު ހުޅުވާލައިފައިވާ ކަމަށެވެ.

އެގޮތުން އެ ފޯޓަލްގައި ރަޖިސްޓަރީ ވުމަށް ދަރިވަރެއްގެ ޕާސްޕޯޓު ކޮޕީ، ސްޓޫޑެންޓް ވިސާ އަދި އެ ދަރިވަރަކު ތައުލީމް ހާސިލްކުރާ ކޮލެޖަކުން ދޭ އެންރޯލްމެންޓް ސިޓީ ހުށައަޅަން ޖެހޭނެ ކަމުގައި އެ ބޭންކުން ބުނެއެވެ. އަދި ރަޖިސްޓްރީވުމަށް އެދޭތާ އެއް ދުވަސްތެރޭގައި ކާޑު ލިމިޓު އިތުރުކޮށްދޭނެ ކަމަށާއި، އެހެނިހެން ބޭނުންތަކަށް 250 ޑޮލަރު އިތުރަށް ކާޑުން ނެގޭނެ ކަމަށް ވެސް ބީއެމްއިލް ވަނީ ބުނެފައެވެ.

ކާޑު ލިމިޓު އިތުރުކޮށް، ބީއެމްއެލް އިން މީގެ ކުރިން ނެރުނު ބަޔާނުގައި އެ ބޭންކުގެ ފުރަތަމަ ދިވެހި ސީއީއޯ މުޙައްމަދު ޝަރީފުް ވިދާޅުވީ، ރާއްޖެއަށް ޑޮލަރުގެ ތާށިކަން ދިމާވެފައިވާ މި ދުވަސްވަރެއް ނަމަވެސް، ބޭރުގެ ކިޔަވާ ދަރިވަރުންނަށް ވެސް ދިމާވާ ދަތިތައް ބޭންކަށް ފާހަގަކުރެވޭ ކަމަށެވެ. އެހެންކަމުން ބޭންކުގެ އެ ނިންމުމަކީ، ބޭރުގައި ކިޔަވާ ދަރިވަރުންނާ މެދު ބޭންކުން ވިސްނައި، އިސްކަންދޭ ކަން ހާމަކޮށްދޭ ކަމެއް ކަމުގައި ވެސް ޝަރީފް ވިދާޅުވިއެވެ.