ވެހިކަލް ޑޮމެއިން ވިއްކަން ހަރުދަނާ އުސޫލެއް ގާއިމްކޮށް، ބީލަމުގައި ޑޮމެއިންތައް ވިއްކަން ހުޅުވާލުމުގެ މަސައްކަތްތައް ދަތުރުފަތުރާ ބެހޭ ވުޒާރާއިން ފަށައިފިއެވެ.

އެކަން އިއުލާންކުރެއްވީ ރައީސް އޮފީހުގައި މިއަދު އޮތް ނޫސްވެރިންގެ ބައްދަލުވުމުގައި ދަތުރުފަތުރާއި މަދަނީ އުދުހުންތަކާ ބެހޭ ވަޒީރު ކެޕްޓަން މުޙައްމަދު އަމީންއެވެ. އެގޮތުން ވަޒީރު ވަނީ، މިދިޔަ ސަރުކާރުގައި ޑޮމެއިންގެ މައްސަލައިގައި އެ ތަކެތި ވިއްކުން މަނާކުރި ކުރުމާއި، ޑޮމެއިންގެ މައްސަލައިގައި އެ ވުޒާރާއަށް ފާހަގަކުރެވުނު ކަންކަން މީޑިޔާއާ ހިއްސާކުރައްވާފައެވެ.

އެގޮތުން ވަޒީރު ވިދާޅުވީ، 1984 ވަނަ އަހަރު އެ ޚިދުމަތް ފެށި ފަހުން، މި ސަރުކާރު ފެށުމާ ހަމައަށް ވެސް އެ ޚިދުމަތުގެ ރެކޯޑުތައް ބަލަހައްޓާފައިހުރީ އަތުން ލިޔެގެން ފޮތްތަކެއްގައި ކަމަށާއި އެގޮތުން ހިމެނެނީ ތިން ފޮތެއް ކަމަށެވެ. އެގޮތުން އެއް ފޮތުގައި ރިކޯޑުކޮށްފައިވަނީ މިނިސްޓްރީން ޚިދުމަތްދީފައިވާ ޑޮމެއިންތަކުގެ މައުލޫމާތް ކަމަށް ވާއިރު، ބާކީ ހުރި ދެ ފޮތުގައި ރިކޯޑުކޮށްފައިވަނީ މިނިސްޓްރީން ވިއްކި ޑޮމެއިންތަކުގެ މައުލޫމާތު ކަމަށެވެ.

އެހެން ނަމަވެސް އެންމެ ފަހުން ޑޮމެއިން ވިއްކި ކަމަށް އެ ފޮތްތަކުން ފެންނަން އޮތީ 2008 ވަނަ އަހަރު ކަމުގައި ވަޒީރު ވިދާޅުވިއެވެ.

ޓްރާންސްޕޯޓް މިނިސްޓަރު މިއަދުގެ ނޫސްވެރިންގެ ބައްދަލުވުމުގައި -- ފޮޓޯ: ރައީސް އޮފީސް

ވަޒީރު ވިދާޅުވީ، އެ ރެކޯޑުތައް އެފަދައިން ބެލެހެއްޓުމުގެ ސަބަބުން މިިދިޔަ ސަރުކާރުގައި ޑޮމެއިން ވިއްކުން މަނާކުރުމަށް ރައީސް އޮފީހުން އެންގުމުން އެކަން ހުއްޓުވާފައި އޮތް ނަމަވެސް، އެކަން އެގޮތުގައި ބޭއްވުމަކީ އެންމެ ރަނގަޅު ގޮތް ނޫން ކަމަށާއި، އެކަމަށް ޙައްލެއް ހޯދުމަކީ އެންމެ ރަނގަޅު ގޮތް ކަމުގައި ދެކެވަޑައިގަންނަވާ ކަމުގައެވެ.

އެގޮތުން އެ މަސައްކަތުގެ ތެރެއިން، އެކަމަށް ހަރުދަނާ އުސޫލެއް ހަދައި، ބީލަމުގެ އުސޫލުން އެ ޑޮމެއިންތައް ވިއްކުމަށް ހުޅުވާލާނެ ކަމަށާއި، އެ ބިޑިންގައި ބޭނުންކުރާނީ އިލެކްޓްރޯނިކް ބިޑިން ސިސްޓަމެއް ކަމުގައި ވަޒީރު ވިދާޅުވިއެވެ.

މިނިސްޓްރީގެ ތެރޭގައި އެހެން ޑޮމެއިން ނަމްބަރު ނަގައިގެން ވަކި ގޮތަކަށް ވިއްކުމުގެ ޖާގައެއް ނުދޭނަން. ހަމަ އޯޕަން ބިޑިން ސިސްޓަމެއްގެ ތެރެއިން އެކަން ކުރަން ފުރުސަތު ދޭނީ. އިލެކްޓްރޯނިކް ބިޑިންގެ ތެރެއިން، - ދަތުރުފަތުރާއި މަދަނީ އުދުހުންތަކާ ބެހޭ ވަޒީރު ކެޕްޓަން މުޙައްމަދު އަމީން

ވަޒީރު ވިދާޅުވީ، ޑޮމެއިންތައް ވިއްކުމަށް ފަހު، އެ ޑޮމެއިންތަކަކީ ސައްޚަ އެއްޗެއްކަން ކަށަވަރުކުރުމަށް ސަރުކާރުގެ މުއައްސަސާތައް އެއް ވިއުގައަކުން ގުޅާލާނެ ކަމަށާއި، އޭގެ ސަބަބުން ފުލުހުންނަށް ވެސް އެ ސިސްޓަމު މެދުވެރިކޮށް ޑޮމެއިންގެ ސައްޚަކަން ކަށަވަރުކުރެވޭނެ ކަމަށެވެ.

އަދި އަލަށް ދޫކުރާ ޑޮމެއިންތަކުގެ ރަޖިސްޓްރީތަކަކީ ވެސް ސެކިއުރިޓީ ވަރުގަދަ ރެޖިސްޓްރީތަކަކަށް ވާނެ ކަމަށާއި، އޭގެ ސަބަބުން އެފަދަ ރަޖިސްޓްރީތައް ފޯޖުކުރުމުގެ ފުރުސަތު ކުޑަވާނެ ކަމަށް ވަޒީރު ވިދާޅުވިއެވެ. އެގޮތުން މިހާރު ދިމާވެފައި އޮތް މައްސަލަ ހައްލުކޮށް، މިވަގުތު ޑޮމެއިންތައް ގަނެފައިވާ ފަރާތްތަކުން އެ ބައެއްގެ ޑޮމެއިންތަކުގެ ލިޔެކިޔުންތައް މި މަހުގެ 17 ވަނަ ދުވަހުން ފެށިގެން 60 ދުވަހުގެ ތެރޭގައި ހުށަހަޅަންޖެހޭނެ ކަމުގައި ވަޒީރު ވިދާޅުވިއެވެ.

އަލަށް ތައާރަފްކުރާ ޑޮމެއިން

އަދި އެ ޑޮމެއިންތައް ބަލައި ޔަގީންކުރުމަށްފަހު، ޑޮމެއިންގެ ރަޖިސްޓްރީ ދޭނީ ސެކިއުރިޓީ ވަރުގަދަ އައު ރަޖިސްޓްރީގައި ކަމަށް ވަޒީރު ވިދާޅުވިއެވެ.

ވަޒީރު ވިދާޅުވި ގޮތުގައި، މި ވަގުތު އެ ވުޒާރާއިން 1،200 އެއްހާ ޑޮމެއިން ވަނީ ދޫކޮށްފައެވެ. އެހެން ނަމަވެސް ރެކޯޑުތައް ބެލެހެއްޓިފައި ނުވާތީ އެ ޑޮމެއިންތަކުގެ ތެރެއިން ސައްޚަ ޑޮމެއިންގެ އަދަދު ކަށަވަރުވެފައިނުވެއެވެ. އެހެން ނަމަވެސް މީގެ ކުރިން ވަޒީރު ވިދާޅުވި ގޮތުގައި، އޭގެ ތެރެއިން 700 އެއްހާ ޑޮމެއިން އަކީ ފޭކު ޑޮމެއިންއެވެ.