ހުޅުމާލޭ ސަހަރާ ކުރިމަތީ އޮންނަ ބިން ހަތަރު ފުރޮޅުލީ އުޅަނދުތައް ޕާކު ކުރަން ހާއްސަކޮށްފިއެވެ.

ދަތުރުފަތުރާ އެތެރޭގެ އުދުހުންތަކާ ގުޅޭ ވަޒީރު މުޙައްމަދު އަމީން މިއަދު ވިދާޅުވީ، ސަހަރާ ކުރިމަތީ އޮންނަ ބިން ހަތަރު ފުރޮޅުލީ އުޅަނދުތައް ޕާކް ކުރުމަށް ހާއްސަކުރީ މާލެ ސަރަހައްދުގައި ދިމާވެފައިވާ ޕާކިންގެ މައްސަލައަށް ވަގުތީ ހައްލެއް ހޯދުމަށެވެ.

އެ ސަރަހައްދުން ބަޔެއް ޕާކިންއަށް ހާއްސަކުރާއިރު ހުޅުމާލޭ މަގުމަތީ ގަވައިދާ ހިލާފަށް ޕާކުކޮށްފައި ހުންނަ އުޅަނދު ޓޯކޮށްފައި ބެހެއްޓުމަށް ވެސް އެ ބިމުން ވަކި ސަރަހައްދެއް ހާއްސަ ކުރާނެ ކަމަށް ވަޒީރު ވިދާޅުވިއެވެ.

އެ ބިމަކީ 90،000 އަކަފޫޓުގެ ބިމަކަށްވާއިރު އޭގެތެރެއިން 50،000 އަކަފޫޓު ހާއްސަ ވާނީ ޕާކިންއަށެވެ. އަދި 40،000 އަކަފޫޓު ބޭނުންކުރާނީ އުޅަނދުތައް ޓޯވް ކުރުމަށެވެ.އެ ސަރަހައްދުގެ ފަސްގަނޑު އެއްވަރުކުރުމުގެ މަސައްކަތް މިހާރު ކުރަމުންދާއިރު ކުރިއަށް އޮތް ދެ ދުވަހެއްގެ ތެރޭ އެ ބިމުގައި ޕާކު ކުރަން ހުޅުވާލާނެ އެވެ.

ހުޅުމާލޭގައި އުޅަނދު ޕާކު ކުރަން ވަކި ސަރަހައްދުތަކެއް ހާއްސަކޮށް ކުލި ދައްކައިގެން އުޅަނދު ޕާކު ކުރެވޭނެ އިންތިޒާމު ހަމަޖެއްސުމުގެ އިތުރުން އަގު ދައްކާގޮތަށް އަދި ނުދައްކާ ގޮތަށް ވެސް ޕާކު ކުރާނެ ޖާގަ ހަމަޖައްސަން ނިންމާފައިވާ ކަމަށް އެޗްޑީސީ އިން ވަނީ މީގެ ކުރިން ބުނެފައެވެ.