ދިވެހިރާއްޖޭގެ ފަތުރުވެރިކަމުގެ ޤާނޫނަށް 13 ވަނަ އިޞްލާޙު ގެނައުމުގެ ބިލު ރައީސުލްޖުމްހޫރިއްޔާ މުހައްމަދު މުއިއްޒު ތަޞްދީޤު ކުރައްވައިފިއެވެ.

ރައީސް މިއަދު ތަސްދީގު ކުރެއްވީ ދިވެހިރާއްޖޭގެ ފަތުރުވެރިކަމުގެ ގާނޫނަށް 13 ވަނަ އިސްލާހު ގެނައުމުގެ ބިލު (ގާނޫނު ނަންބަރު 02/99) އެވެ. މި މަހުގެ 19 ވަނަ ދުވަހު ރައްޔިތުންގެ މަޖިލީހުން ފާސްކުރި މި އިސްލާހުގެ ދަށުން ޓޫރިޒަމް މިނިސްޓްރީން ކުއްޔަށް ދޫކޮށްފައިވާ ރަށްތައް ނުވަތަ ބިންތަކުގެ ކުއްޔަށް ދޫކުރާ މުއްދަތު އިތުރުކުރުމަށް ފީ ދެއްކުމުގެ ސުންގަޑިތަކަށް ބޮޑެތި ބަދަލުތަކެއް ވަނީ ގެނެސްފައެވެ.

އަލަށް ގެނައި އިސްލާހުގެ ދަށުން ކުއްޔަށް ދޫކުރާ މުއްދަތު އިތުރުކުރުމާ ގުޅޭ ފީ ދެއްކުމުގެ ސުންގަޑި ވަނީ ބަދަލުކޮށްފަ އެވެ. މުއްދަތު އިތުރުކުރާ ކޮންމެ އަހަރަކަށް ފައިސާ ދެއްކުމުގެ މުއްދަތު ވަނީ ހަ މަސް ދުވަހަށް ކުރުކޮށްފަ އެވެ. ގާނޫނަށް ގެނައި އިސްލާހަށް އަމަލުކުރަން ފަށާތާ ފުރަތަމަ ހަ މަސް ދުވަހުގެ ތެރޭގައި ފީ ދެއްކުމަށް އިޚްތިޔާރުކުރާ ކުއްޔަށް ދޫކުރާ ފަރާތްތަކުން އަހަރަކު އެއް ލައްކަ ޑޮލަރުގެ ފީއެއް ދައްކަން ޖެހޭއިރު، މި މުއްދަތު ފާސްވުމަށްފަހު ފައިސާ ދެއްކުމަށް އިޚްތިޔާރުކުރާ ކުއްޔަށް ދޫކުރާ ފަރާތްތަކުން އަހަރަކު ދެ ލައްކަ ޑޮލަރުގެ ފީއެއް ދައްކަން ޖެހޭނެ ކަމަށް އިސްލާހުގައި ބުނެފައިވެއެވެ.

މީގެ އިތުރުން ޓޫރިސްޓް ރިސޯޓްތަކާއި އިންޓަގްރޭޓެޑް ޓޫރިސްޓް ރިސޯޓްތަކުގެ ލީސް ހޯލްޑަރުންނަށް އިތުރު ސާޅީސް ނުވަ އަހަރަށް ކުއްޔަށް ދޫކުރެވޭނެ ގޮތް ވެސް އިސްލާހުގައި ވަނީ އިސްލާހުކޮށްފަ އެވެ. މި އިސްލާޙަށް އަމަލުކުރުމަށްޓަކައި ކުއްޔަށް ދޫކުރާ ފަރާތްތަކުން އެ އިސްލާހަށް އަމަލުކުރަން ފަށާތާ ފުރަތަމަ ހަ މަސް ދުވަހުގެ ތެރޭގައި އެއްފަހަރާ 5،000،000 ޑޮލަރު ދައްކަން ޖެހެ އެވެ. ނަމަވެސް ހަ މަސް ދުވަހުގެ މުއްދަތަށް ވުރެ އިތުރަށް ފައިސާ ދެއްކުން ލަސްވެއްޖެ ނަމަ ފީ ދެގުނަ އިތުރުވެ 10،000،000 ޑޮލަރަށް އަރާނެ އެވެ.

މީގެ އިތުރުން ޓޫރިޒަމް ގާނޫނުގެ 5 ވަނަ މާއްދާގެ (ޖ) އާއި 16-16 ވަނަ މާއްދާގެ (ނ) ގެ ދަށުން ކުއްޔަށް ދޫކޮށްފައިވާ ރަށްތައް ކުއްޔަށް ދޫކުރުމުގެ މުއްދަތު އިތުރުކުރުމާ ގުޅޭ މާއްދާތަކަށް ވެސް މި އިސްލާހުގައި ވަނީ ބަދަލު ގެނެސްފަ އެވެ. މި އިޞްލާޙުގެ ދަށުން މިރަށްރަށުގެ ކުއްޔަށް ދޫކޮށްފައިވާ މުއްދަތު އިތުރު 49 އަހަރަށް އިތުރުކުރެވޭނީ، އެރަށްރަށުން ދައްކަންޖެހޭ ކުއްޔާއި ޖޫރިމަނާ ނުވަތަ ޓެކްސްގެ ގޮތުގައި ދައްކަންޖެހޭ 5،000،000 ޑޮލަރު ދެއްކުމުންނެވެ.

މި ބިލު ތަޞްދީޤު ކުރެއްވުމާ ގުޅިގެން، މި ޤާނޫނަށް ވަނީ ދިވެހި ސަރުކާރުގެ ގެޒެޓުގައި ޝާއިޢުކުރައްވައި، ޢަމަލުކުރަން ފަށާފައެވެ.