ހަތަރު ފުރޮޅުލީ އުޅަނދެއް ރަޖިސްޓްރީ ކުރުމުގެ ކުރިން އެ އުޅަނދު ބޭއްވޭނެ ގަރާޖެއް އޮތްކަން ކަށަވަރުކުރަންޖެހޭގޮތައް އެއްގަމުގައި ދުއްވާ އިންޖީނުލީ އުޅަނދު ރަޖިސްޓަރީކުރުމުގެ ގަވާއިދު އިސްލާހުކޮށްފިއެވެ.

ދަތުރުފަތުރާއި މަދަނީ އުދުހުންތަކާ ބެހޭ ވުޒާރާއިން އަލަށް އެކުލަވާލި ގަވާއިދުގައިވާގޮތުން

އަލަށް ގެނެވުނު އިސްލާހުގައި ދެ ފުރޮޅަށްވުރެ ގިނަ ފުރޮޅުލީ އުޅަނދު ބޭއްވޭނެ ޖާގަ އޮތްކަން ވުޒާރާއިން ނުވަތަ ވުޒާރާއިން ކަނޑައަޅާ ފަރާތަކުން ބަލައި ކަށަވަރުކުރަންވާނެކަމަށް ބަޔާންކޮށްފައިވެއެވެ.

މީގެކުރިން ގަވާއިދު އޮންނަނީ ދެ ފުރޮޅަށްވުރެ ގިނަ ފުރޮޅުލީ އުޅަނދެއް ރަޖިސްޓްރީ ކުރުމަށް ގަރާޖެއް އޮތްކަމުގެ ލިޔުމާއި، ގަރާޖުގެ ވެރިފަރާތުގެ އިއުތިރާޒެއް ނެތްކަމުގެ ލިޔުމެއް ދެއްކުމެވެ. އަދި އެ ގަރާޖަކީ ރަޖިސްޓްރީކޮށްފައިވާ ގަރާޖެއްކަން އެނގޭނެ ލިޔުންތައް ހުށަހަޅަން ޖެހުނު ނަމަވެސް އޭރު އެ ގަރާޖުގައި އުޅަނދު ބޭއްވޭނެ ޖާގަ އޮތްކަން ވުޒާރާއިން ކަށަވަރުކުރާކަށް ނުޖެހެއެވެ.

ގަރާޖެއްނެތި އެތެރެކުރާ އުޅަނދުތަކުގެ ސަބަބުން މިހާރުވެސް މާލޭގެ ޕާކިންއަށް ބޮޑެތި މައްސަލަތަކެއް ކުރިމަތިވެފައިވާއިރު މާލެ ސިޓީ އާއި އެޗްޑީސީގެ ދަށުން ގަރާޖުގެ ގޮތުގައި ރަޖިސްޓްރީ ކުރެވޭ ޖާގަތަކާއި، އިޤްތިޞާދީ ތަރައްޤީއާއި ވިޔަފާރިއާ ބެހޭ ވުޒާރާގެ ދަށުން ވިޔަފާރިއާއި ގުދަނުގެ ގޮތުގައި ރަޖިސްޓްރީ ކުރެވޭ ތަންތަން އެއްވިއުގައަކުން ގުޅާލުމަށް ވަނީ ނިންމާފައެވެ. މިގޮތުން އަމިއްލަ ފަރާތްތަކުގެ ގަރާޖުތަކާއި، ސަރުކާރުގެ ޕާކިން ބިލްޑިންތަކާއި އަދި އެހެނިހެން ގަރާޖުތައްވެސް މި ވިއުގައިގައި ހިމެނޭނެކަމަށް ސަރުކާރުން މައުލޫމާތުދެއެވެ.

މިއާއެކު ހައލްު ނުވެ އޮތް މި މައްސަލައަށް ދާއިމީ ހައްލު ލިބިގެންދާނެކަމަށް ސަރުކާރުން ދެކެއެެވެ.