އި ންޓަރނޭޝަނަލް ފްރެންޑްލީ މެޗެއްގައި މިއަދު ރާއްޖެއާއި ބަންގަލްދޭޝް ބައްދަލުކުރި މެޗު 1-0 އިން ރާއްޖެ މޮޅުވެއްޖެއެވެ. މި މެޗުގައި ޖެހުނު ހަމަ އެކަނި ގޯލު ޖަހައިދިނީ ރާއްޖޭގެ ތަޖުރިބާކާރު ފޯވާޑް އަލީ ފާސިރު(ސެންޓޭ) އެވެ. އެއީ މެޗުގެ 18 ވަނަ މިނެޓުގައި ލިބުނު ހިލޭ ޖެހުމަކުން ހަމްޒާ ނަގައިދިން ހުރަހަކުން ފާސިރު ބޮލުން ފޮނުވާލި ބޯޅައެކެވެ.

މިއަދު ބަންގްލަދޭޝްގެ ބަސުންދުރަ އެރީނާގައި ކުޅެވުނު މިމެޗުން މޮޅުވުމާއެކު މިއީ ރާއްޖެ އެންމެ ފަހުން ކުޅުނު 5 މެޗުގެ ތެރެއިން މޮޅުވި ހަމައެކަނި މެޗެވެ. އަދި ބަންގްލަދޭޝް ގެ އަމިއްލަ ދަނޑުގައި އެޓީމާ ދެކޮޅަށް ކުޅުނު ފަސް ފަހަރުގެ ތެރެއިން މޮޅުވި ހަމައެކަނި މެޗެވެ. އަދި މިހާތަނަށް ބަންގްލަދޭޝް އާ ދެކޮޅަށް ރާއްޖެ ކުޅުނު 19 މެޗުގެ ތެރެއިން މޮޅުވި ހަތްވަނަމެޗެވެ.

މި މެޗު ނިމުމާއެކު ދިވެހި ކުޅުންތެރިންވަނީ މި އަހަރުގައި ނިޔާވި ރާއްޖޭގައި އުފެދުނު އެންމެ މޮޅު އަދި ތަޖުރިބާކާރު އެއް މިޑްފީލްޑަރ ކަމަށްވާ ބަކާއަށް ހާއްސަ ޓްރިބިއުޓެއް ދީފައެވެ.

ޤައުމީ ޓީމުގެ މެޗެއް ނުކުޅޭތާ އެއް އަހަރުފަހުން ކުޅުނު މި މެޗުގައި ރާއްޖޭގެ ގޯލް ކީޕަރު ހުސައިން ޝަރީފުގެ ފަރާތުން ވަނީ މޮޅު ސޭވުތަކެއް ފެނިގެން ގޮސްފައެވެ. މެޗުގެ މޮޅުންތެރިޔަކަށްވެސް ހޮވުނީ އޭނާއެވެ. މެޗު ނިންމާފައި ދިން އިންޓަވިއުއެއްގައި އަލީ ފާސިރު ބުނެފައިވަނީ މިއީ އެއް އަހަރު ފަހުން ޤައުމީ ޓީމުގެ މެޗެއް ކުޅެން ލިބުނު ފުރުސަތު ކަމަށާއި އަދި މި މޮޅަކީ ރާއްޖޭގެ ފުޓްބޯޅަ އަށް ލޯބި ކުރާ އެންމެހައި ސަޕޯޓަރުންނަށް ޚާއްސާކުރާ މޮޅެއްކަމުގައެވެ.

ރާއްޖެ އާއި ބަންގްލަދޭޝް ބައްދަލުކުރާ ދެވަނަ މެޗު މި އަންނަ ހޮނިހިރު ދުވަހު ރާއްޖެގަޑިން ހަވީރު 05:00 ގައި ބަންގްލަދޭޝް ގެ ބަސުންދުރަ އެރީނާގައި ކުޅޭނެއެވެ.