ރާއްޖޭގައި ކުށުގެ ވެށީގައި އުޅެނީ ޒުވާނުންގެ އެންމެ 2 އިންސައްތަ ކަމަށާއި މި އަދަދު މަދުކުރެވޭނެކަމަށް އެސިސްޓެންޓް ކޮމިޝަނަރ އޮފް ޕޮލިސް އަޙްމަދު ޝިފާން ވިދާޅުވެއްޖެއެވެ.

އޭސީޕީ މިފަދައިން ވިދާޅުވީ މިއަދު ކުރެއްވި އެކްސް ޕޯސްޓެއްގައެވެ.

ޝިފާން ވިދާޅުވީ ރާއްޖޭގައި ގިނައީ ގަވާއިދުތަކާއި ގާނޫނުތަކަށް ބޯލަނބާ އުފެއްދުންތެރި ޒުވާނުންކަމަށެވެ. އުމުރުން 15 އަހަރާއި 35 އަހަރާ ދެމެދުގެ ޒުވާނުންގެ ތެރެއިން ކުށުގެ ވެށީގައި އުޅެނީ އެންމެ 2 އިންސައްތަ މީހުންކަން އޭސީޕީ ޝިފާން ވަނީ ފާހަގަކުރައްވާފައެވެ.

ޝިފާން އިތުރަށް ވިދާޅުވީ ގައުމަށް ހިދުމަތްކުރުމުގެ ފުރުސަތު ޒުވާނުންނަށް ދިނުމާއެކު އެކި ކަންކަމުގައި ޒުވާނުން ބައިވެރިކޮށްގެން މަސައްކަތްކޮށްފިނަމަ އަދިވެސް ކުށުގެ ވެށީގައި ޒުވާނުން އުޅޭ މިންވަރު މަދުކުރެވިގެންދާނެކަމަށެވެ.

ޝިފާން މިފަދައިން ވިދާޅުވިއިރު ނުރައްކާތެރި ކުށްކުރާ މީހުންގެ ތެރޭގައި ޒުވާނުން ހިމެނެއެވެ. އަދި މީގެ ތެރޭގައި ގިނައީ ތަކުރާރުކޮށް ކުށްކުރާ މީހުންނެވެ.