މޯލްޑިވްސް އިންލަންޑް ރެވެނިއު އޮތޯރިޓީ (މީރާ)ގެ ޑިރެކްޓަރުންގެ ބޯޑުގެ މެންބަރެއްގެ، މެންބަރުކަމުގެ މުއްދަތު ހަމަވާތީވެ، އެ މަގާމަށް ކުރިމަތިލުމުގެ ފުރުސަތު ޢާންމުކޮށް ހުޅުވާލައިފިއެވެ.

ރައީސް އޮފީހުން މިއަދު ކުރި އިއުލާނެއްގައި ބުނީ، އެ ފުރުސަތު ހުޅުވާލައިފައިވަނީ މިއަދުން ފެށިގެން މި މަހުގެ 24ވާ އާދިއްތަ ދުވަހުގެ މެންދުރު 12 ގެ ނިޔަލަށް ކަމަށެވެ.

އެ މަގާމަށް ކުރިމަތިލާ ފަރާތްތަކުގައި ހުންނަން ޖެހޭ ޝަރުތުތައް ވެސް އެ އިއުލާނުގައި ވަނީ ފާހަގަކޮށްފައެވެ. އެގޮތުން ހިމެނެނީ މުސްލިމަކު ކަމުގައި ވުން.، ދިވެހި ރައްޔިތަކު ކަމުގައި ވުން، ބުއްދި ސަލާމަތުން ހުރުން، ޢުމުރުން 18 އަހަރު ފުރިފައިވުން، އިސްލާމްދީނުގައި ހައްދެއް ކަނޑައެޅިފައިވާ ކުށެއް ކުރިކަން ޝަރީއަތަށް ސާބިތުވެފައިވާ މީހަކު ކަމުގައި ނުވުން، އިފްލާސް ކުރެވިފައިވާ މީހަކު ކަމުގައި ނުވުން، ރިޝްވަތުގެ ކުށެއް ސާބިތުވެފައިވާ މީހަކު ކަމުގައި ނުވުން، ގާނޫނުގެއް ދަށުން އިންތިހާބު ކުރެވޭ މަގާމެއް ފުރަމުންދާ މީހަކު ކަމުގައި ނުވުން އަދި ސަރުކާރުގެ ނުވަތަ އަމިއްލަ ކުންފުންޏެއްގައި އިސްކޮށް ހަރަކާތްތެރިވެ ނުވަތަ ޑިރެކްޓަރުންގެ ބޯޑުގައި ހިމެނޭ މީހަކު ކަމުގައި ނުވުން ހިމެނެއެވެ.

މީގެ އިތުރުން ޓެކްސް، އިގްތިސާދު، މާލީ އެކައުންޓިން، ވިޔަފާރި އަދި ގާނޫނޫގެ ދާއިރާއިން މާސްޓާސް ނުވަތަ ޑިގްރީ ފެންވަރުގެ ސަނަދެއް އޮތުން ނުވަތަ ފަސް އަހަރުގެ ތަޖުރިބާ ލިބިފައިވުމާއި އަދި އެއްވެސް ސިޔާސީ ޕާޓީއެއްގެ މެންބަރަކު ކަމުގައި ނުވުމަކީ ވެސް އެ މަގާމުގެ ޝަރުތެކެވެ.

އެ މަގާމަށް ކުރިމަތުލުމަށް ބޭނުންވާ ފަރާތްތަކުން ފޯމާއި، އިގްރާރާއި، ކުށާއި ދަރަނީގެ ރެކޯޑް ފޯމާއި އަދި އެ ނޫން ވެސް ފޯމުތައް، ރަސްމީ ބަންދު ނޫން ދުވަސްތަކުގެ ހެނދުނު 08:30 އިން 12:00 އަށް ރައީސް އޮފީހަށް ހުށަހެޅުމަށް އެ އޮފީހުން އެދެއެވެ.