ވަކިވަކި ރަށްތަކުގައި ޖަލުތައް ޤާއިމުކޮށްފައިވުމަކީ ޖަލުތައް ހިންގުމުގައި ޚަރަދު ބޮޑުވާންޖެހޭ އެންމެ ބޮޑު ސަބަބު ކަމަށާއި، ރާއްޖޭގެ ޖަލުތަކުގެ ހާލަތު ރަނގަޅުކުރުމަށް ސަރުކާރުގެ އަމާޒަކީ ސެންޓްރަލް ޕްރިޒަންސް ކޮމްޕްލެކްސްއެއް ގާއިމު ކުރުންކަމަށް ހޯމް މިނިސްޓަރ އަލީ އިހުސާން ވިދާޅުވެއްޖެއެވެ.

Ad by Hajj Corporation

ރާއްޖޭގައި ޖަލުތައް ގާއިމު ކުރެވިފައި ވަނީ، ޖަލުތައް ހުންނަން ޖެހޭ އުސޫލާއި އެއްގޮތަކަށް ނޫންކަމަށާއި، ރައީސް ޑރ މުއިއްޒުގެ އެންމެ ބޮޑު ސިޔާސަތަކީ ރާއްޖޭގައި ސެންޓްރަލް ޖަލެއް އެޅުންކަމަށްވެސް އިޙްސާން ވަނީ ފާހަގަ ކުރައްވާފައެވެ.

ޖަލު ހިންގުމަކީ ވަރަށް ޚަރަދުބޮޑު ކަމެއްކަމަށާއި މިހާރު މަހެއްގެ މައްޗަށް ޤައިދީއެއްގެ ބޮލަކަށް 27،000 ރުފިޔާ ޚަރަދުވާ ކަމަށާއި މި މައްސަލަ ހައްލުކުރުމަށްޓަކައި ދިރާސާކުރުމަށްފަހު ސެންޓްރަލް ޖަލެއް ޤާއިމުކުރުމަށް ނިންމާފައިވާ ކަމަށްވެސް މިނިސްޓަރ ވިދާޅުވިއެވެ.

އަލަށް ހަދާ ސެންޓްރަލް ޖަލު ޤާއިމުކުރުމަށް ހަމަޖެހިފައިވަނީ މާލެއާ ކައިރިން މިހާރު ހިއްކަމުންދާ ސަރަޙައްދެއްގައި ކަމަށް ވަޒީރު ހާމަކުރެއްވިއެވެ. އަދި މި ޖަލު 3 އަހަރު ދުވަހުގެ ތެރޭގައި އޮޕަރޭޝަނަށް ގެނައުމަށް މަސައްކަތްކުރަމުންދާ ކަމަށާއި، މި ޖަލު ހެދުމާއެކު ޚަރަދު ކުޑަކުރެވޭނެ ކަމަށްވެސް ވިދާޅުވިއެވެ.

ވަޒީރު އިތުރަށް ވިދާޅުވީ، ސަރުކާރުގެ އުއްމީދަކީ ޖަލުތަކަށް ކުރެވޭ ޚަރަދު ކުޑަކޮށް ޖަލުތަކުން ނެރެވޭ ނަތީޖާ އިތުރުކުރުން ކަމަށެވެ.