ޔޫއޭއީ އަދި ތައިލެންޑުން އާސަންދައިގެ ޚިދުމަތް ފޯރުކޮށްދިނުމުގެ ކަންކަން ހަމަޖެހިގެންދާނެ ކަމަށް އެންސްޕާގެ ސީއީއޯ ހީނާ ވަލީދު މިއަދު ވިދާޅުވެއްޖެއެވެ.

ހީނާ ނިހެން ވިދާޅުވީ، ރައްޔިތުންގެ މަޖިލީހުގެ އިޖުތިމާޢީ ކޮމިޓީގައި މެންބަރަކު ކުރެއްވި ސުވާލަކަށް މިއަދު ޖަވާބު ދެއްވަމުންނެވެ.

ހީނާ ވިދާޅުވި ގޮތުގައި ‘’އިރާދަކުރެއްވިއްޔާ’’ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، މި ވަޢުދު ފުއްދަވާނެއެވެ. އަދި މިހާރުވެސް އެކަމާ ގުޅޭ މަސައްކަތްތައް ކުރިއަށްދާ ކަމަށާއި، އެ ދެ ޤައުމުގެ ހޮސްޕިޓަލްތަކާއެކު މަޝްވަރާކޮށް، ކުރިއަށް ދެވޭނެ ގޮތެއް ހޯދާފައިވާ ކަމަށް އޭނާ ވިދާޅުވިއެވެ.

އެންސްޕާގެ ސީއީއޯ އިތުރަށް ވިދާޅުވި ގޮތުގައި މިކަމާ ގުޅޭ އިތުރު ތަފްޞީލާއި ތާރީޚެއް ވަރަށް އަވަހަށް ހާމަކުރާނެއެވެ.

ފާހަގަކޮށްލެވޭ ކަމަކީ، ތައިލެންޑާއި ޔޫއޭއީ އަށް އާސަންދަ ފުޅާކުރުމަށް ރައީސް ޑރ. މުޙައްމަދު މުޢިއްޒު ނިންމަވައި، އެކަން އިޢުލާންކުރައްވާފައިވަނީ މިދިޔަ ޖެނުއަރީ މަހުގައެވެ.