ޕްރޮސެކިއުޓާ ޖެނެރަލް (ޕީޖީ)ގެ މަގާމަށް އައްޔަންކުރައްވާފައިވާ އައްބާސް ޝަރީފަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ އެއްވެސް ނުފޫޒެއް ނޯންނާނެ ކަމަށް ރައީސް އޮފީހުގެ ތަރުޖަމާނު ހީނާ ވަލީދު ވިދާޅުވެއްޖެއެވެ.

ރައީސް އޮފީހުގައި މިއަދު ކުރިއަށްދިޔަ ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަަކަށް ޖަވާބުދެއްވަމުން ހީނާ ވިދާޅުވީ، މިިނިވަން މުވައްސަސާތަކަށް އައްޔަން ކުރެވޭ ބޭފުޅުންނަކީ ވަރަށް މިނިވަންކަމާއި އެކީގައި އެބޭފުޅުންގެ ދައުރު އަދާ ކުރެވޭނެ ބޭފުޅުން ކަމަށާއި، އެކަންކަމަށް ސަރުކާރުގެ ނުފޫޒެއް ނޯންނާނެ ކަމަށެވެ. އަދި އެކަމަށް ރައީސްގެ އެއްވެސް ބާރެއްވެސް ނުފޫޒެއްވެސް ނޯންނާނެ ކަމަށް ހީނާ ވިދާޅުވިއެވެ.

ޕީޖީގެ މަގާމަށް އައްބާސް އައްޔަނުކުރެއްވީ، މިއަދު ރައީސް އޮފީހުގައި ބޭއްވި ރަސްމިއްޔާތެއްގައެވެ. އެގޮތުން ޕީޖީ ކަމުގެ ފަތްކޮޅު، އައްބާސްއަށް އެރުވީ ރައީސް ޑރ. މުޙައްމަދު މުޢިއްޒުއެވެ.

ޕީޖީގެ މަގާމަށް އައްބާސް އައްޔަނުކުރުމަށް ރައްޔިތުންގެ މަޖިލީހުން ރުހުން ދިނީ އިއްޔެގެ ވަގުތެއްގައެވެ. ޕީޖީގެ މަގާމަށް އައްޔަނުކުރެއްވުމަށް ރައީސް މުޢިއްޒު، މަޖިލީހަށް ފޮނުއްވި ހަމައެކަނި ނަންފުޅަކީ ވެސް އައްބާސްގެ ނަންފުޅެވެ.

އައްބާސް އަށް ރުހުން ދިނުމަށް މަޖިލީހުން ފާސްކުރީ ދައުރުން ބޭރުން އިއްޔެ ބޭއްވި ހާއްސަ ޖަލްސާގައެވެ. އެ ޖަލްސާގައި އައްބާސް އަށް ރުހުން ދިނީ 85 މެންބަރުންގެ ވޯޓުންނެވެ. އައްބާސްއަށް ރުހުން ނުދޭން އެއްވެސް މެންބަރަކު ވޯޓު ދެއްވާފައެއް ނުވެއެވެ.

އައްބާސް މިވަގުތު އަދާކުރައްވަނީ ރައީސް އޮފީހުގެ ލީގަލް ސެކެޓްރީގެ މަގާމުކަމެވެ.

ޔުނިވާސިޓީ އޮފް ޓެސްމޭނިއާ އިން ގާނޫނީ ދާއިރާގެ މަތީ ތައުލީމް ހާސިލް ކުރައްވާފައިވާ އަައްބާސް އަކީ ގާނޫނީ ދާއިރާގެ ތަޖުރިބާ ވެސް ހުންނެވި ބޭފުޅެކެވެ. 2011 އިން 2015 ގެ ނިޔަލަށް ހައި ކޯޓުގެ ފަނޑިޔާރުކަން ވެސް އައްބާސް ކުރެއްވިއެވެ.